കോഴിക്കോട്: കുടുംബ കലഹത്തെ തുടര്‍ന്ന് മരുമകന്‍ ഭാര്യാ മാതാവിന്റെ തലയ്‌ക്കടിച്ചു. കോഴിക്കോട് വളയം കല്ലുനിര സ്വദേശി ചുണ്ടേമ്മല്‍ ലിജിനാണ് (25) ഭാര്യാമാതാവിനെ അടിച്ചത്. ഭാര്യയുമായുണ്ടായ വാക്ക് തര്‍ക്കങ്ങളാണ് കയ്യാങ്കളിയിലേക്ക് എത്തിയത്. പരുക്കേറ്റ വളര്‍പ്പാംകണ്ടി പുഴക്കല്‍ സ്വദേശിനി മഹിജ (48) കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
ശനിയാഴ്ച ഉച്ചയോടെയാണ് സംഭവം. പുതുവത്സരത്തിനോടനുബന്ധിച്ച് പിണങ്ങിപ്പോയ ഭാര്യയ്‌ക്ക് കേക്ക് വാങ്ങി അവരുടെ വീട്ടിലെത്തിയിരുന്നു. എന്നാല്‍ ഭാര്യ കേക്ക് ലിജിന്റെ മുഖത്തേയ്‌ക്ക് എറിഞ്ഞു. ഇതിന്റെ പ്രതികാരം തീര്‍ക്കാനായി ലിജിന്‍ വീണ്ടും ഭാര്യവീട്ടിലെത്തുകയായിരുന്നു.
തുടര്‍ന്ന് ഭാര്യ വീട്ടുകാരുമായി വാക്ക് തര്‍ക്കത്തിലേര്‍പ്പെടുകയും ഇത് കയ്യാങ്കളിയിലേക്ക് നീങ്ങി. ലിജിന്‍ ഭാര്യാമാതാവിന്റെ തലയ്‌ക്കടിക്കുകയുമായിരുന്നു. ഇവരെ ഉടന്‍ ആശുപത്രിയില്‍ എത്തിച്ചു. സംഭവത്തില്‍ വളയം പോലീസ് ലിജിനെ അറസ്റ്റ് ചെയ്തു. കോടതിയില്‍ ഹാജരാക്കും.
പ്രതികരിക്കാൻ ഇവിടെ എഴുതുക: