മധുര: ടിടിവി ദിനകരന് നേതൃത്വം നല്കുന്ന അമ്മാമക്കള് മുന്നേറ്റ കഴകം പാര്ട്ടിയിലും എതിര്പാര്ട്ടിയിലുംപെട്ട രാഷ്ട്രീയതടവുകാര് ജയിലില് ഏറ്റുമുട്ടി. അതീവ സുരക്ഷയുള്ള മധുര സെന്ട്രല് ജയിലിനുള്ളില് രണ്ട് വിഭാഗം തടവുകാര് തമ്മിലുണ്ടായ സംഘര്ഷം തമിഴ്നാട് സര്ക്കാരിനെയും ജയില്വകുപ്പിനെയും പ്രതികൂലമായി ബാധിച്ചിട്ടുണ്ട്. സംഭവത്തില് മൂന്നുപേര്ക്ക് പരിക്കേറ്റു.
തിരുച്ചിറപ്പള്ളി സെന്ട്രല് ജയിലില് നിന്ന് മധുര സെന്ട്രല് ജയിലിലേക്ക് മാറ്റപ്പെട്ട രാഷ്ട്രീയ തടവുകാരുമായി എതിര്വിഭാഗം ആറുമാസമായി ജയിലിനുള്ളില് നിരന്തരം വാക്കേറ്റമാണ്. ഇത് കഴിഞ്ഞ ദിവസം രൂക്ഷമായി. ഇതോടെ തടവുകാര് പരസ്പരം ആക്രമിച്ചു. ആഹാരം കഴിക്കുന്ന പ്ലേറ്റുകള് കീറിയെടുത്തായിരുന്നു ആക്രമണം. സംഘര്ഷസമയത്ത് 50 തടവുകാര് ജയില് കെട്ടിടത്തിന്റെ മുകളില് കയറി ജയില് സമുച്ചയത്തോട് ചേര്ന്നുള്ള പ്രധാന റോഡില് കല്ലും കുപ്പികളും എറിഞ്ഞ് ജനശ്രദ്ധ ആകര്ഷിക്കുന്ന വിധം മുദ്രാവാക്യങ്ങള് വിളിച്ചു.
ഇവരില് രണ്ട് തടവുകാര് പ്ലേറ്റിന്റെ മൂര്ച്ചയുള്ള ഭാഗം ശരീരത്തില് കുത്തികയറ്റി രക്തം വരുത്തിയും ഭീകരാന്തരീക്ഷം സൃഷ്ടിച്ചു. കൂടുതല് പോലീസുകാര് ജയിലില് എത്തിയാണ് സ്ഥിതിഗതികള് നിയന്ത്രണവിധേയമാക്കിയത്. ജയില് സൂപ്രണ്ട് ടി.തമിഴ്സെല്വന് തടവുകാരുമായി ചര്ച്ച നടത്തി മതിയായ സുരക്ഷ ഉറപ്പാക്കി. പരിക്കേറ്റ തടവുകാരെ ജയില് ആശുപത്രിക്കുള്ളില് തന്നെ ചികിത്സ നല്കി. കൊലപാതകകേസുകളിലടക്കമുള്ള രാഷ്ട്രീയതടവുകാരെ വേവ്വേറെ ജയിലുകളില് താമസിപ്പിക്കണമെന്ന ആവശ്യവും ഇതോടെ ഉയര്ന്നുവന്നിട്ടുണ്ട്. ഇക്കാര്യം ജയില്വകുപ്പ് പരിശോധിച്ചുവരികയാണ്.
