ആലപ്പുഴ: രണ്‍ജീത് ശ്രീനിവാസനെ പോപ്പുലര്‍ഫ്രണ്ട്, എസ്ഡിപിഐക്കാര്‍ കൊലപ്പെടുത്തിയതില്‍ എസ്ഡിപിഐ സംസ്ഥാന പ്രസിഡന്റ് അഷറഫ് മൗലവിയുടെ പങ്ക് അന്വേഷണ വിധേയമാക്കണമെന്ന് ഹിന്ദുഐക്യവേദി സംസ്ഥാന അദ്ധ്യക്ഷ കെ.പി. ശശികല ടീച്ചര്‍ ആവശ്യപ്പെട്ടു. മണ്ണഞ്ചേരിയില്‍ എസ്ഡിപിഐക്കാരന് നേരെ അക്രമം നടന്ന് മിനിറ്റുകള്‍ക്കകം അക്രമത്തിന് പിന്നില്‍ ആര്‍എസ്എസുകാരാണെന്ന് ഇയാള്‍ പ്രസ്താവിച്ചത് അണികള്‍ക്കുള്ള സന്ദേശമായിരുന്നു. ഇതാണ് രണ്‍ജീതിന്റെ കൊലപാതകത്തില്‍ കലാശിച്ചത്.
മതപണ്ഡിതനെന്ന പരിവേഷമുള്ള ഇയാള്‍ മുസ്ലിം ചെറുപ്പക്കാരില്‍ അന്യമതവിഷം കുത്തിവെച്ച് കലാപത്തിന് ശ്രമിക്കുകയാണ്. കൃത്യമായ അന്വേഷണം നടത്തിയാല്‍ ഇയാളുടെ പങ്ക് വെളിവാകും എന്നും ശശികല ടീച്ചര്‍ പറഞ്ഞു. രണ്‍ജീത് ശ്രീനിവാസന്റെ വീട് സന്ദര്‍ശിച്ച് അമ്മയേയും ഭാര്യയേയും, സഹോദരനേയും ആശ്വസിപ്പിച്ച ശേഷം മാദ്ധ്യമങ്ങളോട് സംസാരിക്കുകയായിരുന്നു.
യഥാര്‍ത്ഥ പ്രതികളെ പിടികൂടണമെങ്കില്‍ ദേശീയ ഏജന്‍സി അന്വേഷിക്കണം. അമ്മയുടേയും, ഭാര്യയുടേയും, മകളുടെയും മുന്നില്‍ വെച്ചാണ് പൈശാചികമായ കൊലപാതകം നടന്നത്. കൊലയാളികള്‍ക്ക് മതത്തിന്റെ സംരക്ഷണം നല്‍കാനാണ് ശ്രമം. പോലീസിനെ നിഷ്‌ക്രിയമാക്കാന്‍ ആസൂത്രിത നീക്കം നടക്കുന്നു. പോലീസുകാര്‍ ജയ്ശ്രീറാം എന്ന് വിളിപ്പിച്ചു എന്നതടക്കമുള്ള പ്രചാരണം ഇതിന്റെ ഭാഗമാണെന്നും ശശികല ടീച്ചര്‍ പറഞ്ഞു. ഹിന്ദുഐക്യവേദി സംസ്ഥാന സെക്രട്ടറി കെ. പ്രഭാകരന്‍, മഹിളാ ഐക്യവേദി സംസ്ഥാന ജനറല്‍ സെക്രട്ടറി ബിന്ദുമോഹന്‍, ജില്ലാ ജനറല്‍ സെക്രട്ടറി സി.എന്‍. ജിനു, സംഘടനാ സെക്രട്ടറി ശശികുമാര്‍ എന്നിവര്‍ ടീച്ചര്‍ക്കൊപ്പമുണ്ടായിരുന്നു.
പ്രതികരിക്കാൻ ഇവിടെ എഴുതുക: