ന്യൂദല്‍ഹി: ഇന്ത്യന്‍ വ്യോമസേനയുടെ യുദ്ധ വിമാനം രാജസ്ഥാനിലെ ജയ്‌സാല്‍മീറില്‍ തകര്‍ന്ന് വീണു. ഇന്ന് വൈകിട്ട് എട്ടരക്കാണ് പരീക്ഷണ പറക്കല്‍ നടത്തിയിരുന്ന വ്യോമസേനയുടെ മിഗ് 21 വിമാനം തകര്‍ന്ന് വീണതെന്ന് ഇന്ത്യന്‍ വ്യോമസേന ട്വീറ്റ് ചെയ്തു. അപകടത്തിന്റെ കൃത്യമായ സ്ഥലം ഇതുവരെ വെളിപ്പെടുത്തിയിട്ടില്ല.
അതേസമയം സാം പോലീസ് സ്‌റ്റേഷന്റെ കീഴിലുള്ള ഡെസേര്‍ട്ട് നാഷണല്‍ പാര്‍ക്ക് ഏരിയയിലാണ് വിമാനം തകര്‍ന്നതെന്ന് ജെയ്‌സാല്‍മീര്‍ എസ്പി അജയ് സിംഗ് അറിയിച്ചു. ലോക്കല്‍ പൊലീസ് സ്ഥലത്തെത്തിയെന്നും താനും അപകടസ്ഥലത്തേക്കുള്ള യാത്രയിലാണെന്നും എസ്പി പറഞ്ഞു.
പൈലറ്റ് മാത്രമാണ് വിമാനത്തില്‍ ഉണ്ടായിരുന്നതെന്നാണ് പ്രാഥാമിക വിവരം. പൈലറ്റിനായി തിരച്ചില്‍ തുടരുകയാണ്. വിമാനം തകര്‍ന്നതിന്റെ കാരണം ഇതുവരെയും ലഭ്യമല്ല. സംഭവത്തില്‍ വ്യോമസേന അന്വേഷണം പ്രഖ്യാപിച്ചു.
