എരുമേലി: എരുമേലി വഴിയുള്ള പരമ്പരാഗത കാനനപാത തുറക്കാന്‍ നടപടിയായി. കഴിഞ്ഞ രണ്ടു വര്‍ഷം അടച്ചിട്ട എരുമേലി മുതല്‍ പമ്പ വരെയുള്ള പരമ്പരാഗത കാനന പാതയാണ് തുറക്കാന്‍ തീരുമാനമായിരിക്കുന്നത്. എരുമേലി വഴിയുള്ള പരമ്പരാഗത കാനനപാത തുറക്കണമെന്ന് ആവശ്യപ്പെട്ട് 16ന് വിശ്വഹിന്ദുപരിഷത്ത്, ഹിന്ദു ഐക്യവേദി, ക്ഷേത്ര സംരക്ഷണ സമിതി, ശബരിമല അയ്യപ്പസേവാ സമാജം എന്നീ സംഘടനകളുടെ നേതൃത്വത്തില്‍ എരുമേലിയില്‍ നൂറുകണക്കിന് അയ്യപ്പ വിശ്വാസികള്‍ പങ്കെടുത്ത പ്രതിഷേധ മാര്‍ച്ച് നടത്തിയിരുന്നു.
പരമ്പരാഗത കാനനപാതയിലെ പ്രധാനപ്പെട്ട താവളങ്ങളായ കോയിക്കക്കാവ്, കാളകെട്ടി, ഇഞ്ചിപ്പാറക്കോട്ട, മുക്കുഴി, പുതുശ്ശേരിമല, കരിമല, വലിയാനവട്ടം, ചെറിയാനവട്ടം, ഞൊണങ്ങാര്‍ പാലം വരെയുള്ള ഭാഗങ്ങളാണ് വഴി വെട്ടിത്തെളിക്കുന്നത്. കാനനപാത തെളിയിക്കുന്നതിനായി ഇഡിസിയെയും അതാത് ഭാഗങ്ങളില്‍ കച്ചവടം ചെയ്യുന്നവരെയുമാണ് ചുമതലപ്പെടുത്തിയിരിക്കുന്നത്. എന്നാല്‍ പരമ്പരാഗത കാനനപാത തെളിക്കുന്നത് എളുപ്പമല്ലെന്നും, കൂടുതല്‍ സുരക്ഷയൊരുക്കിവേണം തുറക്കേണ്ടതെന്നും എരുമേലി ഡെപ്യൂട്ടി റേഞ്ച് ഓഫീസര്‍ ജയകുമാര്‍ പറഞ്ഞു.
കാനനപാതയില്‍ അടിസ്ഥാന സൗകര്യങ്ങള്‍ ഒരുക്കേണ്ടതുണ്ട്. മുന്‍കാലങ്ങളില്‍ ഒരുക്കിയിട്ടുള്ള ഓക്സിജന്‍ പാര്‍ലര്‍, കുടിവെള്ളം, അന്നദാനം, ക്ലിനിക്കുകള്‍, വെളിച്ചം എന്നിവയടക്കം ചെയ്യേണ്ടതുണ്ടെന്നും അദ്ദേഹം പറഞ്ഞു. ഇന്ന് മുതല്‍ കോയിക്കക്കാവ് മുതല്‍ ഞൊണങ്ങാര്‍ പാലം വരെയുള്ള 30 കിലോമീറ്ററോളം വരുന്ന പാത വെട്ടിത്തെളിക്കാന്‍ തുടങ്ങും. മണ്ഡലപൂജ കഴിഞ്ഞ് ജനുവരി ഒന്നു മുതല്‍ ശബരിമല തീര്‍ഥാടകര്‍ക്കായി പരമ്പരാഗത കാനനപാത തുടര്‍ന്ന് കൊടുക്കാനുള്ള തീരുമാനത്തിലാണ് അധികൃതര്‍.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: