തിരുവന്തപുരം:പൊലീസിനെതിരെ വിമര്ശനവുമായി മുന് ഡിജിപി ആര് ശ്രീലേഖ. ഒരു വീട്ടമ്മയുടെ പരാതി പറയാന് വിളിച്ച തനിക്ക് ശംഖുമുഖം അസി.കമ്മീഷണറില് നിന്നും ഉണ്ടായത് വളരെ മോശം പ്രതികരണമാണെന്ന് ആര് ശ്രീലേഖ പറഞ്ഞു. ഒരു പൊലീസ് ഉദ്യോഗസ്ഥയായ തനിക്ക് ഈ അനുഭവമാണ് ഉണ്ടാകുന്നത് എങ്കില് മറ്റുള്ളവരുടെ കാര്യം എന്താകുമെന്ന ആശങ്കയും ശ്രീലേഖ പങ്കുവെയ്ക്കുന്നുണ്ട്. എന്തുകൊണ്ടാണ് പൊലീസിന് ഇത്രയും ചീത്തപ്പേരുണ്ടായത്? എന്ന ചോദ്യവും തന്റെ ഫേസ്ബുക്ക് പോസ്റ്റിലൂടെ ശ്രീലേഖ ചോദിച്ചു.
കടുത്ത പീഡനങ്ങള് നേരിട്ട ഒരു വീട്ടമ്മയുടെ പരാതിയുമായി ബന്ധപ്പെട്ടാണ് ശംഖുമുഖം അസി.കമ്മീഷണറെ വിളിച്ചത്. എന്നാല് തീര്ത്തും അപ്രതീക്ഷിതമായ സമീപനമാണ് അദ്ദേഹത്തിന്റെ ഭാഗത്ത് നിന്നും ഉണ്ടായത്. വലിയതുറ പൊലീസ് സ്റ്റേഷന്, വനിതാ സെല് മറ്റു ചില പോലീസ് ഓഫീസുകള്, അവരെല്ലാം അവളെ ഭീഷണിപ്പെടുത്തി. സ്വന്തം കുഞ്ഞുമായി ഭര്ത്താവിന്റെ വീടൊഴിയാനാണ് പൊലീസുകാര് അവളോട് ആവശ്യപ്പെട്ടത്. ഈ വിഷയത്തെക്കുറിച്ച് സംസാരിക്കാനായി ശംഖുമുഖം അസി.കമ്മീഷണറെ വിളിച്ചപ്പോള് അയാള് എന്നോട് ഫോണിലൂടെ പൊട്ടിത്തെറിക്കുകയാണ് ചെയ്തത്. സ്വന്തം പേര് വെളിപ്പെടുത്തി സംസാരിക്കാന് പോലും അദ്ദേഹം തയ്യാറായില്ല. ഈ വിഷയത്തില് ഞാന് പൊലീസിനെ പിന്തുണയ്ക്കുകയാണ് വേണ്ടതെന്ന് അയാള് എന്നോട് പറഞ്ഞു. ഇങ്ങനെയുള്ള സ്ത്രീകള് പറയുന്ന കഥകള് കേട്ട് തന്നെ പോലെയുള്ള ഉദ്യോഗസ്ഥരെ വിളിക്കരുതെന്നും എസിപി എന്നോട് ആവശ്യപ്പെട്ടു.’ ആര് ശ്രീലേഖ ഫേസ്ബുക്കില് കുറിച്ചു.
എസിപിയുടെ ഈ പെരുമാറ്റത്തെ കുറിച്ച് പരാതിപ്പെടാന് ഞാന് ക്രമസമാധാന ചുമതലയുള്ള എഡിജിപിയെ ഫോണില് വിളിച്ചെങ്കിലും അദ്ദേഹം എന്റെ കോള് എടുത്തില്ല. കാര്യങ്ങള് വിശദീകരിച്ച് അദ്ദേഹത്തിന് ഞാനൊരു എസ്.എംഎസ് അയച്ചെന്നും. എന്താണ് എഡിജിപി ചെയ്യുന്നത് എന്ന് നോക്കാം, പാവം ലിജി ആത്മഹത്യ മാത്രമായിരിക്കുമോ ഇനി അവള്ക്കുള്ള ഏകവഴി എന്നാണ് എന്റെ ആശങ്കയെന്നും പോസ്റ്റിലൂടെ ശ്രീലേഖ പറഞ്ഞു.
