ന്യൂദല്‍ഹി: സംയുക്ത സൈനിക മേധാവി ജനറല്‍ ബിപിന്‍ റാവത്തും മറ്റ് 12 പേരും കൊല്ലപ്പെട്ട ഐഎഎഫ് ഹെലികോപ്റ്റര്‍ അപകടത്തെക്കുറിച്ചുള്ള വിശദാംശങ്ങള്‍ നല്‍കി പ്രതിരോധ മന്ത്രി രാജ്‌നാഥ് സിംഗ് വ്യാഴാഴ്ച പാര്‍ലമെന്റില്‍ ഔദ്യോഗിക പ്രസ്താവന നടത്തി. സിഡിഎസ് സ്റ്റുഡന്റ് ഓഫീസര്‍മാരുമായി സംവദിക്കാനായി വെല്ലിംഗ്ടണിലേക്ക് പോകവേ ലാന്‍ഡിംഗിന് കുറച്ച് മിനിറ്റുകള്‍ക്ക് മുമ്പ് ഉച്ചയ്‌ക്ക് 12.08 ന് സുലൂര്‍ എയര്‍ ബേസ് എയര്‍ ട്രാഫിക് കണ്‍ട്രോളിന് മി17 വി5 ഹെലികോപ്റ്ററുമായുള്ള ബന്ധം നഷ്ടപ്പെട്ടതായി അദ്ദേഹം വിശദീകരിച്ചു. എയര്‍ മാര്‍ഷല്‍ മാനവേന്ദ്ര സിങ്ങിന്റെ നേതൃത്വത്തില്‍ സംയുക്ത സൈനിക അന്വേഷണത്തിന് ഐഎഎഫ് ഉത്തരവിട്ടിട്ടുണ്ടെന്നും അദ്ദേഹം വെളിപ്പെടുത്തി.
പ്രസ്താവനയുടെ പൂര്‍ണരൂപം-
സ്റ്റുഡന്റ് ഓഫീസര്‍മാരുമായി സംവദിക്കാന്‍ വെല്ലിംഗ്ടണിലെ ഡിഫന്‍സ് സര്‍വീസസ് സ്റ്റാഫ് കോളേജില്‍ ഷെഡ്യൂള്‍ ചെയ്ത സന്ദര്‍ശനത്തിലാണ് ജനറല്‍ ബിപിന്‍ റാവത്ത് ഇന്നലെ രാവിലെ 11:48 ന് സുലൂര്‍ എയര്‍ ബേസില്‍ നിന്ന് എയര്‍ഫോഴ്‌സ് എംഐ 17 വി 5 ഹെലികോപ്റ്റര്‍ പറന്നുയര്‍ന്നത്. ഉച്ചയ്‌ക്ക് 12:15 ന് വെല്ലിംഗ്ടണില്‍ ഇറങ്ങാനായിരുന്നു ഷെഡ്യൂള്‍ ചെയ്തിരുന്നത്. എന്നാല്‍, സൂലൂര്‍ എയര്‍ ബേസിലെ എയര്‍ ട്രാഫിക് കണ്‍ട്രോളിന് ഏകദേശം 12:08 ന് ഹെലികോപ്റ്ററുമായുള്ള ബന്ധം നഷ്ടപ്പെട്ടു, തുടര്‍ന്ന്, കൂനൂരിനടുത്തുള്ള വനത്തില്‍ തീപിടിത്തം കണ്ട് നാട്ടുകാരില്‍ ചിലര്‍ ഓടിയെത്തി. സൈനിക ഹെലികോപ്റ്ററിന്റെ അവശിഷ്ടങ്ങള്‍ അഗ്‌നിക്കിരയായി.സമീപത്തുള്ള പ്രാദേശിക ഭരണകൂടത്തിന്റെ രക്ഷാസംഘങ്ങള്‍ സ്ഥലത്തെത്തി രക്ഷപ്പെട്ടവരെ അപകടസ്ഥലത്ത് നിന്ന് വീണ്ടെടുക്കാന്‍ ശ്രമിച്ചു.
അവശിഷ്ടങ്ങളില്‍ നിന്ന് കണ്ടെടുത്ത എല്ലാവരെയും വെല്ലിംഗ്ടണിലെ മിലിട്ടറി ഹോസ്പിറ്റലില്‍ എത്തിച്ചു. ഹെലികോപ്റ്ററിലുണ്ടായിരുന്ന ആകെ 14 പേരില്‍ 13 പേര്‍ മരണത്തിന് കീഴടങ്ങിയതായി സ്ഥിരീകരിച്ചു. മരിച്ചവരില്‍ സിഡിഎസിന്റെ ഭാര്യയും ഉള്‍പ്പെടുന്നു. ബപിന്‍ റാവത്തിന്റെ ഭാര്യ മധുലിക റാവത്ത്, അദ്ദേഹത്തിന്റെ പ്രതിരോധ ഉപദേഷ്ടാവ് ബ്രിഗ് ലഖ്ബിന്ദര്‍ സിംഗ് ലിഡ്ഡര്‍, സ്റ്റാഫ് ഓഫീസര്‍ ലെഫ്റ്റനന്റ് കേണല്‍ ഹര്‍ജീന്ദര്‍ സിംഗ്, വ്യോമസേനാ ഹെലികോപ്റ്റര്‍ ക്രൂ ഉള്‍പ്പെടെ ഒമ്പത് സായുധ സേനാംഗങ്ങള്‍, വിങ് കമാന്‍ഡര്‍ പൃഥ്വി സിംഗ് ചൗഹാന്‍, സ്‌ക്വാഡ്രണ്‍ ലീഡര്‍ കുല്‍ദീപ് സിംഗ്, ജൂനിയര്‍ വാറന്റ് ഓഫീസര്‍ റാണ. പ്രതാപ് ദാസ്, ജൂനിയര്‍ വാറന്റ് ഓഫീസര്‍ അറക്കല്‍ പ്രദീപ്, ഹവില്‍ദാര്‍ സത്പാല്‍ റായ്, നായിക് ഗുര്‍സേവക് സിംഗ്, നായിക് ജിതേന്ദ്ര കുമാര്‍, ലാന്‍സ് നായിക് വിവേക് കുമാര്‍, ലാന്‍സ് നായിക് ബി സായ് തേജ എന്നിവരാണ് മരിച്ചത്.
കൂടാതെ, ഗ്രൂപ്പ് ക്യാപ്റ്റന്‍ വരുണ്‍ സിംഗ് വെല്ലിംഗ്ടണിലെ മിലിട്ടറി ഹോസ്പിറ്റലില്‍ ലൈഫ് സപ്പോര്‍ട്ടിലാണെന്നും അദ്ദേഹത്തിന്റെ ജീവന്‍ രക്ഷിക്കാനുള്ള എല്ലാ ശ്രമങ്ങളും നടക്കുന്നുണ്ടെന്നും അദ്ദേഹം സൂചിപ്പിച്ചു. പൂര്‍ണ സൈനിക ബഹുമതികളോടെയാണ് ജനറല്‍ റാവത്തിനെ സംസ്‌കരിക്കുകയെന്നും പ്രതിരോധ മന്ത്രി.
പ്രതികരിക്കാൻ ഇവിടെ എഴുതുക: