കൊച്ചി: കൊച്ചിയില്‍ നടന്ന മിസ് കേരള 2021 മത്സരത്തില്‍ സൗന്ദര്യ റാണിയായി കണ്ണൂര്‍ സ്വദേശിനി ഗോപിക സുരേഷ്. 24 സുന്ദരികളെ പിന്തള്ളിയാണ് ഗോപിക സുരേഷ് സൗന്ദര്യ പട്ടം നേടിയത്. എറണാകുളം സ്വദേശി ലിവ്യ ലിഫി ഫസ്റ്റ് റണ്ണറപ്പായി. തൃശൂര്‍ സ്വദേശിയും ഓസ്‌ട്രേലിയയില്‍ വിദ്യാര്‍ത്ഥിയുമായ ഗഗന ഗോപാല്‍ ആണ് സെക്കന്റ് റണ്ണറപ്പ്.
കേരളീയം, ലെഹംഗ, ഗൗണ്‍ എന്നീ മൂന്ന് റൗണ്ടുകളില്‍ മികച്ച പ്രകടനം നടത്തിയവരാണ് വിജയികളാവുക. കേരള മുണ്ടും വേഷ്ടിയും അണിഞ്ഞാണ് കേരളീയം റൗണ്ടില്‍ മത്സരാര്‍ഥികള്‍ വേദിയിലെത്തിയത്. മിസ് ബ്യൂട്ടിഫുള്‍ ഹെയര്‍, മിസ് ബ്യൂട്ടിഫുള്‍ സ്‌കിന്‍, മിസ് ബ്യൂട്ടിഫുള്‍ സ്‌മൈല്‍, മിസ് ബ്യൂട്ടിഫുള്‍ ഐസ്, മിസ് ഫോട്ടോജനിക്, മിസ് കണ്‍ജീനിയാലിറ്റി, മിസ് ടാലന്റഡ് എന്നീ പട്ടങ്ങളും വേദിയില്‍ സമ്മാനിച്ചു.
സംവിധായകന്‍ ജീത്തു ജോസഫ്, സംഗീത സംവിധായകന്‍ ദീപക് ദേവ് എന്നിവരടങ്ങിയ ജഡ്ജിങ് പാനലാണ് വിജയികളെ തെരഞ്ഞെടുത്തത്. ഫൈനല്‍ റൗണ്ടിലേക്ക് തെരഞ്ഞെടുക്കപ്പെട്ട 5 പേരില്‍ വിജയിയെ നിര്‍ണയിച്ചത് വിധികര്‍ത്താക്കളുടെ ചോദ്യോത്തര റൗണ്ടുവഴിയാണ്. യുവാക്കളിലെ ലഹരി ഉപയോഗം സംബന്ധിച്ച ചോദ്യത്തിന് മികച്ച ഉത്തരം നല്‍കിയതിലൂടെയാണ് ഗോപിക വിജയിയായത്. മിസ് കേരളയായ ഗോപിക സുരേഷ് ബംഗളൂരുവില്‍ വിദ്യാര്‍ത്ഥിയാണ്.
പ്രതികരിക്കാൻ ഇവിടെ എഴുതുക: