തിരൂര്: കോഴിക്കോട് സര്വകലാശാലയുടെ 11 ബിഎഡ് കേന്ദ്രങ്ങളുടെ അംഗീകാരം നാഷണല് കൗണ്സില് ഫോര് ടീച്ചര് എജ്യൂക്കേഷന് (എന്സിടിഇ) പിന്വലിച്ചു. എന്സിടിഇ നിര്ദേശിച്ചിട്ടുള്ള മാനദണ്ഡങ്ങള് ലംഘിച്ചെന്ന് കണ്ടത്തിയാണ് നടപടി. 2014 മുതല് എന്സിടിഇ പല മാനദണ്ഡങ്ങളിലും മാറ്റം വരുത്തിയിട്ടുണ്ട്. പല കോഴ്സുകളുടെയും കാലാവധി രണ്ട് വര്ഷമാക്കി ഉയര്ത്തുകയും ചെയ്തു. ഏഴ് വര്ഷമായിട്ടും അടിസ്ഥാന സൗകര്യങ്ങളിലടക്കം വേണ്ട മാറ്റങ്ങള് വരുത്താതിരുന്നതാണ് ഈ കേന്ദ്രങ്ങളുടെ അംഗീകാരം നഷ്ടമാകാന് കാരണമായത്.
ഈ കേന്ദ്രങ്ങളില് പഠിക്കുന്നതും പഠിച്ചതുമായ ധാരാളം വിദ്യാര്ത്ഥികളുടെ ഭാവി തന്നെ പ്രതിസന്ധിയിലാക്കുന്നതാണ് ഈ തീരുമാനം. പുതിയ അധ്യയന വര്ഷനത്തിലേക്കുള്ള പ്രവേശന നടപടികള് പുരോഗമിക്കുന്നതിനിടെയാണ് ഈ നടപടി വരുന്നത്. ഏകദേശം അമ്പത് സീറ്റ് വച്ചാണ് ഓരോ കേന്ദ്രത്തിലുമുള്ളത്.
സര്വകലാശാലയുടെ 11 ബി എഡ് കേന്ദ്രങ്ങളും പ്രവര്ത്തിക്കുന്നത് വാടക കെട്ടിടങ്ങളിലാണ്. ഇവയ്ക്കെല്ലാം പെട്ടന്നു തന്നെ പുതിയ കെട്ടിടം കണ്ടെത്തുന്നത് പ്രായോഗികമല്ല. വിഷയം ചര്ച്ച ചെയ്യാന് കോഴിക്കോട് സര്വ്വകലാശാല സെനറ്റ് യോഗം ഉടന് ചേരും. അംഗീകാരം പെട്ടന്ന് പുനസ്ഥാപിക്കാനുള്ള സാധ്യത വളരെക്കുറവാണ്. അംഗീകാരം പിന്വലിച്ച സാഹചര്യത്തില് സീറ്റുകള് നഷ്ടപ്പെടാതിരിക്കാനും അഡ്മിഷന് നല്കിയ വിദ്യാര്ത്ഥികളുടെ കാര്യത്തില് എന്ത് ചെയ്യാന് പറ്റുമെന്നുമുള്ള കാര്യങ്ങളായിരിക്കും സെനറ്റ് യോഗത്തില് ചര്ച്ചയാവുക.
