ബെര്‍ലിന്‍: പോളീഷ് സ്‌ട്രൈക്കര്‍ റോബര്‍ട്ട് ലെവന്‍ഡോസ്‌കി ഗോളടി തുടരുന്നു. ഈ വര്‍ഷത്തെ തന്റെ അറുപതാം ഗോള്‍ നേടി ലെവന്‍ഡോസ്‌കി ബയേണ്‍ മ്യൂണിക്കിന് വിജയം സമ്മാനിച്ചു. ബുന്ദസ്‌ലിഗില്‍ മുന്നിട്ടുനില്‍ക്കുന്ന ബയേണ്‍ മ്യൂണിക്ക് ഒന്നിനെതിരെ രണ്ട് ഗോളുകള്‍ക്ക് ഫ്രീബര്‍ഗിനെ തോല്‍പ്പിച്ചു.
മത്സരത്തിന്റെ 75-ാം മിനിറ്റിലാണ് ലെവന്‍ഡോസ്‌കി ഗോള്‍ നേടിയത്. ലെവന്‍ഡോസ്‌കിയുടെ ഈ വര്‍ഷത്തെ അറുപതാം ഗോളാണിത്. ഇതില്‍ അമ്പത്തിയൊന്നും ബയേണിനായാണ് സ്്‌കോര്‍ ചെയ്തത്. ഒമ്പതെണ്ണം സ്വന്തം രാജ്യമായ പോളണ്ടിനുവേണ്ടിയും.
ലെവന്‍ഡോസ്‌കി നേരത്തെ ഒരു സീസണില്‍ ഏറ്റവും കൂടുതല്‍ ഗോള്‍ നേടുന്ന താരമെന്ന റെക്കോഡ് സ്വന്തമാക്കിയിരുന്നു. 2020-21 സീസണില്‍ 41 ഗോളുകള്‍ അടിച്ചാണ് റെക്കോഡിട്ടത്.
ഫ്രീബര്‍ഗിനെതിരെ മുപ്പതാം മിനിറ്റില്‍ ബയേണ്‍ ലീഡ് എടുത്തു. ലിയോണ്‍ ഗോറേറ്റ്‌സ്‌കയാണ് സ്‌കോര്‍ ചെയ്തത്. 75-ാം മിനിറ്റില്‍ ലെവന്‍ഡോസ്‌കി ലീഡ്് 2- 0 മാക്കി. രണ്ടാം പകുതിയുടെ ഇഞ്ചുറി ടൈമില്‍ ഫ്രീബര്‍ഗ് ഒരു ഗോള്‍ മടക്കി.
ഈ വിജയത്തോടെ ബയേണ്‍ 11 മത്സരങ്ങളില്‍ 28 പോയിന്റുമായി ഒന്നാം സ്ഥാനത്ത് തുടരുകയാണ്.
പ്രതികരിക്കാൻ ഇവിടെ എഴുതുക: