കോഴിക്കോട്: ലൈംഗികാധിക്ഷേപം നടത്തിയെന്ന ആരോപണത്തില്‍ എംഎസ്എഫ് നേതാക്കള്‍ക്കെതിരെ പോലീസ് കുറ്റപത്രം സമര്‍പ്പിച്ചു. ഹരിത നേതാക്കളുടെ പരാതിയില്‍ എംഎസ്എഫ് സംസ്ഥാന പ്രസിഡന്റ് പി.കെ. നവാസിനെതിരെ കോഴിക്കോട് വെള്ളയില്‍ പോലീസാണ് കുറ്റപത്രം സമര്‍പ്പിച്ചത്.
അതേസമയം എംഎസ്എഫ് മലപ്പുറം ജില്ലാ ജനറല്‍ സെക്രട്ടറി അബ്ദുല്‍ വഹാബിനെതിരേയും ഉയര്‍ന്നിരുന്നെങ്കിലും കുറ്റപത്രത്തില്‍ നിന്ന് ഇയാളെ ഒഴിവാക്കി. ഹരിത യോഗത്തിനിടെ ലൈംഗികമായി അധിക്ഷേപിക്കുന്ന വിധത്തില്‍ പ്രസ്താവന നടത്തിയെന്നതാണ് ഇരുവര്‍ക്കുെതിരെുള്ള ആരോപണം. തുടര്‍ന്ന് ഇവര്‍ മുസ്ലിംലീഗ് നേതൃത്വത്തിന് മുമ്പാകെ പരാതി അറിയിച്ചെങ്കിലും നടപടി എടുക്കാത്തതിനെ തുടര്‍ന്നാണ് വനിത കമ്മിഷനെ സമീപിക്കുകയായിരുന്നു. ഈ മാസം 2 നാണ് പോലീസ് കോടതിയില്‍ കുറ്റപത്രം സമര്‍പ്പിച്ചത്. ആകെ 18 സാക്ഷികളാണ് കേസിലുള്ളത്.
വനിതാ കമ്മീഷന്‍ കോഴിക്കോട് സിറ്റി പോലീസ് കമ്മിഷണര്‍ക്ക് പരാതി കൈമാറുകയും തുടര്‍ന്ന് സ്‌പെഷ്യല്‍ ബ്രാഞ്ച് അന്വേഷണം നടത്തുകയും റിപ്പോര്‍ട്ട് പോലീസിന് കൈമാറുകയും ചെയ്തു. ഈ റിപ്പോര്‍ട്ടിന്റെ അടിസ്ഥാനത്തിലാണ് വെള്ളയില്‍ പോലീസ് കേസ് എടുത്ത് അന്വേഷിച്ചത്.
ജൂണ്‍ 22ന് ഹരിതയിലെ സംഘടനാ പ്രശ്‌നങ്ങള്‍ ചര്‍ച്ച ചെയ്യുന്ന ഘട്ടത്തില്‍ ഹരിത നേതാക്കളുടെ അഭിപ്രായം തേടിയ എം എസ് എഫ് സംസ്ഥാന പ്രസിഡന്റ് ‘വേശ്യയ്‌ക്കും വേശ്യയുടെ അഭിപ്രായം കാണും എന്ന് പി.കെ. നവാസ് പരാമര്‍ശിച്ചതായാണ് പരാതിയില്‍ ആരോപിക്കുന്നത്. ഇതിന് സമാനമായ രീതിയിലായിരുന്നു അബ്ദുള്‍ വഹാബിന്റെയും പ്രതികരണം.
പ്രതികരിക്കാൻ ഇവിടെ എഴുതുക: