നീണ്ട ഇടവേളയ്‌ക്ക് ശേഷം മലയാളത്തിന്റെ പ്രിയ നടന്‍ സുരേഷ് ഗോപി പഴയ പ്രൗഡിയോടെ ശക്തമായ നായക വേഷത്തില്‍ തിരികെ വെള്ളിത്തിരയിലെത്തുകയാണ്. ‘കാവല്‍’ എന്ന ചിത്രത്തിലൂടെയാണ് അദേഹം വീണ്ടും മലയാളികള്‍ക്കു മുന്നിലെത്തുന്നത്. ഇതേ ചിത്രത്തിലൂടെ അദേഹം മലയാള ഗാനരംഗത്തേക്ക് ഒരു പ്രഗത്ഭനായ പിന്നണി ഗായകനെക്കൂടി സമ്മാനിക്കുകയാണ്.
2019 ല്‍ സുരേഷ് ഗോപി അവതാരകനായെത്തിയ നിങ്ങള്‍ക്കുമാകാം കോടീശ്വരന്‍ എന്ന പരിപാടിയിലെ മത്സരാര്‍ത്ഥിയായിരുന്ന സംഗീതയുടെ ഭര്‍ത്താവ് സന്തോഷാണ് മലയാള സിനിമാ ഗാന മേഖലയിലേക്ക് എത്തുന്ന പുതിയ ഗായകന്‍. ശാരീരിക വെല്ലുവിളികള്‍ നേരിടുന്ന സന്തോഷിന് പാടാന്‍ അവസരം നല്‍കാമെന്ന് പരിപാടിയ്‌ക്കിടെ അദേഹം വാക്ക് നല്‍കിയിരുന്നു. ആ വാക്കാണ് കാവലിലൂടെ അദേഹം സാധിച്ചു നല്‍കിയത്.
ചിത്രത്തിലെ ‘കാര്‍മേഘം മൂടുന്നു…’ എന്നു തുടങ്ങുന്ന ഗാനമാണ് സന്തോഷ് പാടിയത്. കഴിഞ്ഞ ദിവസം കാവലിന്റെ അണിയറപ്രവര്‍ത്തകര്‍ ഗാനം പുറത്തിറക്കിയിരുന്നു. സുരേഷ് ഗോപി, സന്തോഷിനെ പരിചയപ്പെടുത്തിക്കൊണ്ടാണ് വീഡിയോ തുടങ്ങുന്നത്. സ്റ്റുഡിയോയില്‍ സന്തോഷ് പാടുന്ന രംഗങ്ങളുള്ള ഗാനത്തിന്റെ ചെറിയൊരു ഭാഗം മാത്രമാണ് വീഡിയോയിലുള്ളത്. ഗാനത്തെ ഇതിനോടകം തന്നെ ആസ്വാദകര്‍ നെഞ്ചേറ്റിക്കഴിഞ്ഞു. മികച്ച പ്രതികരണങ്ങളാണ് സന്തോഷിനെയും ഗാനത്തെയും തേടിയെത്തിയിരിക്കുന്നത്. ഹൃദ്യമായ ആലാപനം കൊണ്ട് സന്തോഷ് മലയാളിയുടെ മനസ്സ് കീഴടക്കിയിരിക്കുകയാണ്.
ബി.കെ ഹരിനാരായണന്റേതാണ് വരികള്‍. രഞ്ജിന്‍ രാജ് ആണ് ഈണം പകര്‍ന്നിരിക്കുന്നത്. സുരേഷ് ഗോപിയെ കേന്ദ്ര കഥാപാത്രമാക്കി രണ്‍ജി പണിക്കറുടെ മകന്‍ സംവിധാനം ചെയ്യുന്ന ചിത്രമാണ് കാവല്‍. തമ്പാന്‍ എന്ന ശക്തമായ നായക വേഷത്തിലൂടെയാണ് മലയാളിയുടെ പ്രിയപ്പെട്ട ആക്ഷന്‍ ഹീറോ തിരിച്ചുവരവ് നടത്തുന്നത്. രണ്‍ജി പണിക്കറും ശ്രദ്ധേയമായ വേഷത്തിലൂടെ ചിത്രത്തിന്റെ ഭാഗമാവുന്നുണ്ട്. പത്മരാജ് രതീഷ്, മുത്തുമണി, റേച്ചല്‍ ഡേവിഡ്, ഇവാന്‍ അനില്‍, സാദീഖ്, കിച്ചു ടെല്ലസ്, ശങ്കര്‍ രാമകൃഷ്ണന്‍ തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. നവംബര്‍ 25ഓടെ ചിത്രം തീയേറ്ററുകളിലെത്തുമെന്നാണ് കരുതുന്നത്.
പ്രതികരിക്കാൻ ഇവിടെ എഴുതുക: