തിരുവനന്തപുരം : അങ്കമാലി- എരുമേലി ശബരി പാതയുടെ നിര്‍മാണം ഏറ്റെടുക്കാന്‍ തയാറെന്ന് കേരള റെയില്‍ ഡവലപ്മെന്റ് കോര്‍പറേഷന്‍ (കെ- റെയില്‍). ഇത് സംബന്ധിച്ച് കേന്ദ്ര റെയില്‍വേ മന്ത്രാലയത്തിന്റെ അനുമതി തേടും. കേന്ദ്ര റെയില്‍വെ മന്ത്രിയുമായി മുഖ്യമന്ത്രി പിണറായി വിജയന്‍ കൂടിക്കാഴ്ച നടത്തുമ്പോള്‍ ഇക്കാര്യം ചര്‍ച്ച ചെയ്യും.
അങ്കമാലി- എരുമേലി ശബരി റെയില്‍പ്പാതയുടെ എസ്റ്റിമേറ്റ് പുതുക്കാനുള്ള ലിഡാര്‍ സര്‍വേ മഴ മാറിയാല്‍ ഉടന്‍ നടത്തുമെന്ന് കെ- റെയില്‍ കഴിഞ്ഞ ദിവസം അറിയിച്ചിരുന്നതാണ്. രാമപുരം മുതല്‍ എരുമേലി വരെയുള്ള 44 കിമീ ദൂരത്തിലാണു ഇനി സര്‍വേ ചെയ്യാനുള്ളത്. ശബരി പാതയ്‌ക്കു ദക്ഷിണ റെയില്‍വേയും കോട്ടയം ജില്ലാ കളക്ടറും സംയുക്തമായി അംഗീകരിച്ച അലൈന്‍മെന്റിലാണ് ലിഡാര്‍ സര്‍വേ നടത്തുക. അലൈന്‍മെന്റുമായി ബന്ധപ്പെട്ട് പൊതുതാത്പ്പര്യ ഹര്‍ജിയില്‍ ഹൈക്കോടതി നേരത്തെ തീര്‍പ്പ് കല്‍പിച്ചതാണ്. ഇതേത്തുടര്‍ന്ന പുതുക്കിയ എസ്റ്റിമേറ്റ് തയാറാക്കാന്‍ റെയില്‍വേ ബോര്‍ഡ് കെ- റെയിലിനെ ചുമതലപ്പെടുത്തുകയായിരുന്നു.
നിലവില്‍ സര്‍വ്വേ നടത്താനായുള്ള ഗ്രൗണ്ട് കണ്‍ട്രോള്‍ പോയിന്റുകള്‍ സ്ഥാപിക്കുന്ന പണികള്‍ നടന്നു വരികയാണ്. ജന ജീവിതത്തിന് തടസമുണ്ടാകാത്ത രീതിയിലാണ് ചെറുവിമാനം ഉപയോഗിച്ചുള്ള ലിഡാര്‍ സിസ്റ്റം ഉപയോഗിച്ചു സര്‍വേ നടത്തുന്നത്. വിമാനത്തിലെ ലേസര്‍ യൂണിറ്റ്, സ്‌കാനര്‍, ജിപിഎസ് റിസീവര്‍, ക്യാമറ എന്നിവ ഉപയോഗിച്ചാണ് സര്‍വ്വേ നടത്തുന്നത്. ലേസര്‍ യൂണിറ്റില്‍ നിന്നുള്ള രശ്മികള്‍ ഭൂമിയുടെ ഉപരിതലത്തിലെത്തി തിരിച്ചെത്തുമ്പോള്‍ അത് സര്‍വറില്‍ സ്വീകരിച്ചാണ് രൂപരേഖ തയാറാക്കുന്നത്.
ഭൂമിയുടെ കിടപ്പ് സംബന്ധിച്ച വിശദവും കൃത്യവുമായ വിവരങ്ങള്‍ ഇതിലൂടെ ലഭിക്കും. കാലാവസ്ഥ അനുകൂലമെങ്കില്‍ സര്‍വേയ്‌ക്ക് ഒരു ദിവസം മതിയാകും. സംസ്ഥാനത്തെ ശക്തമായ മഴയെ തുടര്‍ന്ന് സര്‍വ്വേ മാറഅറി വെച്ചിരിക്കുകയായിരുന്നു. സര്‍വേ പൂര്‍ത്തിയാക്കിയാല്‍ രണ്ടാഴ്ചയ്‌ക്കുള്ളില്‍ പുതുക്കിയ എസ്റ്റിമേറ്റ് റെയില്‍വേ ബോര്‍ഡിനു കൈമാറും. പദ്ധതിയുടെ പകുതി ചെലവു കേരളം വഹിക്കാമെന്നു റെയില്‍വേ ബോര്‍ഡിനെ നേരത്തെ അറിയിച്ചിരുന്നു.
പ്രതികരിക്കാൻ ഇവിടെ എഴുതുക: