തിരുവനന്തപുരം കഴക്കൂട്ടം സൈനിക സ്‌കൂളിലെ 2022-23 വര്‍ഷത്തെ ആറ്, ഒന്‍പത് ക്ലാസുകളിലേയ്‌ക്കുള്ള ഓള്‍ ഇന്ത്യ സൈനിക സ്‌കൂള്‍ പ്രവേശന പരീക്ഷകള്‍ക്കുള്ള അപേക്ഷകള്‍ ക്ഷണിച്ചു. ആറാം ക്ലാസിലേക്ക് ആണ്‍കുട്ടികള്‍ക്കും, പെണ്‍കുട്ടികള്‍ക്കും, ഒമ്പതാം ക്ലാസിലേക്ക് ആണ്‍കുട്ടികള്‍ക്കും അപേക്ഷിക്കാം.
ഓണ്‍ലൈനായി അപേക്ഷ സമര്‍പ്പിക്കേണ്ട അവസാന തീയതി 2021 ഒക്‌ടോബര്‍ 26 ആണ്. 2022 ജനുവരി 03 നാണ് പ്രവേശന പരീക്ഷ. ആറാം ക്ലാസ്സിലേക്ക് 75 ആണ്‍കുട്ടികള്‍ക്കും 10 പെണ്‍കുട്ടികള്‍ക്കുമാണ് ഒഴിവുള്ളത്. ഒമ്പതാം ക്ലാസിലേക്കുള്ള ഒഴിവുകള്‍ മറ്റ് സംസ്ഥാനങ്ങളില്‍ നിന്നുള്ള ആണ്‍കുട്ടികള്‍ക്ക് റിസര്‍വ് ചെയ്തിരിക്കുന്നു.
ആറാംക്ലാസിലേയ്‌ക്ക് അപേക്ഷിക്കാന്‍ 2022 മാര്‍ച്ച് 31ന് 10 വയസ്സിനും 12 വയസ്സിനും ഇടയ്‌ക്ക് പ്രായമുണ്ടായിരിക്കണം. ഒമ്പതാം ക്ലാസ്സിലേക്ക് 13നും 15നും മദ്ധ്യേയും. ഒമ്പതാം ക്ലാസ്സിലേക്ക് അപേക്ഷിക്കുന്നവര്‍ ഏതെങ്കിലും അംഗീകാരമുള്ള സ്‌കൂളില്‍ എട്ടാം ക്ലാസ്സ് പാസ്സായവരായാകണം.
വിശദ വിവരങ്ങള്‍ക്ക് www.sainikschooltvm.nic.in അല്ലെങ്കില്‍ https://aissee.nta.nic.in എന്നീ വെബ്‌സൈറ്റുകള്‍ സന്ദര്‍ശിക്കുക.
പ്രവേശന പരീക്ഷയുടെയും തുടര്‍ന്നുള്ള അഭിമുഖത്തിന്റയും, വൈദ്യപരിശോധനയുടെയും അടിസ്ഥാനത്തില്‍ തയ്യാറാക്കുന്ന മെറിറ്റ് ലിസ്റ്റില്‍ നിന്നും മാത്രമായിരിക്കും പ്രവേശനം. പ്രവേശന പരീക്ഷ സംബന്ധിച്ചു പരിശീലനത്തിന് ഒരു സ്ഥാപനത്തെയും വ്യക്തിയെയും സ്‌കൂള്‍ നിയോഗിച്ചിട്ടില്ല.
പ്രതികരിക്കാൻ ഇവിടെ എഴുതുക: