ന്യൂയോര്ക്ക്: യുഎസ് ഓപ്പണ് വനിതാ സിംഗിള്സില് ചരിത്രം കുറിച്ച് ബ്രിട്ടീഷ് ടെന്നീസ് താരം. യോഗ്യതാ റൗണ്ട് കടന്നെത്തി കിരീടം നേടി ബ്രിട്ടന്റെ 18കാരിയായ എമ്മ റാഡുകാനുവാണ് ടെന്നീസ് ലോകത്ത് പുതിയ ചരിത്രമെഴുതിയത്. താരത്തിന്റെ ആദ്യ ഗ്രാന്ഡ്സ്ലാം കിരീടമാണിത്. ഫൈനലില് കാനഡയുടെ 19കാരി ലെയ്ല അനി ഫെര്ണാണ്ടസിനെ നേരിട്ടുള്ള സെറ്റുകള്ക്ക് തകര്ത്താണ് എമ്മ കിരീടം സ്വന്തമാക്കിയത്. സ്കോര്: 6-4, 6-3. ടൂര്ണമെന്റില് ഒറ്റ സെറ്റുപോലും വിട്ടുകൊടുക്കാതെയാണ് എമ്മയുടെ കിരീടധാരണം. കിരീടനേട്ടത്തോടെ ലോക റാങ്കിങ്ങില് എമ്മ 23-ാം സ്ഥാനത്തേക്കും ലെയ്ല 27-ാം സ്ഥാനത്തേക്കും ഉയരും.
കൂടാതെ ഓപ്പണ് കാലഘട്ടത്തില് സീഡ് ചെയ്യപ്പെടാത്ത താരങ്ങള് ഏറ്റുമുട്ടിയ ആദ്യ ഗ്രാന്ഡ്സ്ലാം ഫൈനലെന്ന പ്രത്യേകതയും ഈ മത്സരത്തിനുണ്ടായിരുന്നു. ലോക റാങ്കിങ്ങില് 150-ാം സ്ഥാനക്കാരിയായാണ് എമ്മ മത്സരത്തിനിറങ്ങിയത്. 73-ാം സ്ഥാനത്തായിരുന്നു ലെയ്ല. കിരീടനേട്ടത്തോടെ ഓപ്പണ് കാലഘട്ടത്തില് യോഗ്യതാ റൗണ്ട് വഴി വന്ന് ഒരു ഗ്രാന്ഡ്സ്ലാം കിരീടം നേടുന്ന ആദ്യ വനിതാ താരമെന്ന നേട്ടവും എമ്മ സ്വന്തമാക്കി.
കൂടാതെ 44 വര്ഷങ്ങള്ക്കു ശേഷം വനിതാ സിംഗിള്സ് ഗ്രാന്ഡ്സ്ലാം കിരീടം നേടുന്ന ബ്രിട്ടീഷ് താരവുമായി എമ്മ. 1977ല് വിംബിള്ഡണ് കിരീടം നേടിയ വിര്ജീനിയ വെയ്ഡാണ് ഇതിനു മുമ്പ് ബ്രിട്ടനായി ഗ്രാന്ഡ്സ്ലാം കിരീടം നേടിയ താരം. റഷ്യന് താരം മരിയ ഷറപ്പോവയ്ക്കുശേഷം ഗ്രാന്ഡ്സ്ലാം കിരീടം നേടുന്ന ഏറ്റവും പ്രായം കുറഞ്ഞ് താരവുമാണ് എമ്മ. 2004ല് തന്റെ 17-ാം വയസിലാണ് ഷറപ്പോവ വിംബിള്ഡണ് വിജയിക്കുന്നത്.
ലോക റാങ്കിങ്ങില് ആദ്യ അഞ്ച് സ്ഥാനങ്ങളിലുള്ള മൂന്നു താരങ്ങളെ അട്ടിമറിച്ച് ഫൈനലിലെത്തിയ ലെയ്ലയ്ക്കു പക്ഷേ ഫൈനലില് മികവു തുടരാനായില്ല. അര്തര് അഷെ സ്റ്റേഡിയത്തിലെ ചരിത്ര ഫൈനലില് ബ്രിട്ടിഷ് ഇതിഹാസ താരങ്ങളായ വിര്ജീനിയ വെയ്ഡിനെയും ടിം ഹെന്മാനെയും സാക്ഷിയാക്കിയായിരുന്നു എമ്മയുടെ കിരീട ധാരണം.
