തിരുവനന്തപുരം: കേന്ദ്ര സിലബസില്‍ പഠിക്കുന്ന വിദ്യാര്‍ത്ഥികള്‍ക്ക് കേരളത്തില്‍ ഉപരി പഠനത്തിന് അവസരങ്ങള്‍ കുറയുന്ന പ്രശ്‌നത്തില്‍ ഇടപെടാന്‍ ഗവര്‍ണര്‍ സന്നദ്ധത അറിയിച്ചു. ഇതു സംബന്ധിച്ച്, സിബിഎസ്ഇ സ്‌ക്കൂള്‍ മാനേജ്‌മെന്റ് അസോസിയേഷന്‍ ഗവര്‍ണര്‍ക്ക് നിവേദനം നല്കിയിരുന്നു. ഉന്നയിച്ച കാര്യം അനുഭാവപൂര്‍വ്വം പരിഗണിക്കാമെന്ന് ഗവര്‍ണര്‍ ആരിഫ് മുഹമ്മദ് ഖാന്‍ അറിയിച്ചു. വിദ്യാര്‍ത്ഥികളുടെ പ്രയാസം മുഖ്യമന്ത്രിയുടെ ശ്രദ്ധയില്‍ കൊണ്ടുവരാമെന്നും ആവശ്യമായ നടപടികള്‍ക്ക് കേന്ദ്ര സര്‍ക്കാരിനോടും സിബിഎസ്ഇയോടും ശുപാര്‍ശ ചെയ്യാമെന്നും ഗവര്‍ണര്‍ ഉറപ്പു നല്കി.
സിബിഎസ്ഇ ഇത്തവണ 10, 12 ക്ലാസ് പരീക്ഷകള്‍ നടത്തിയിരുന്നില്ല. പകരം നടത്തിയ മൂല്യ നിര്‍ണ്ണയത്തിലൂടെ, മുന്‍കാല ശരാശരി നോക്കിയുള്ള വിജയം നല്കുകയാണ് ചെയ്തത്. എന്നാല്‍ പാഠഭാഗങ്ങളുടെ നാലിലൊന്ന് പഠിച്ച്, മുഴുവന്‍ മാര്‍ക്കും വാങ്ങാന്‍ കഴിയുന്ന രീതിയാണ് കേരള സിലിബസില്‍ സ്വീകരിച്ചത്. അതോടെ, കേരള സിലബസില്‍ പഠിച്ചവരില്‍ മുഴുവന്‍ മാര്‍ക്കും വാങ്ങിയവരുടെ എണ്ണവും എ പ്ലസ് എണ്ണവും പതിന്മടങ്ങ് കൂടി.
കേന്ദ്ര സിലബസില്‍ 90 ശതമാനം വാങ്ങിയ പത്താംക്ലാസ് വിദ്യാര്‍ത്ഥിയ്‌ക്ക് പോലും സ്‌റ്റേറ്റ് ഹയര്‍ സെക്കന്ററിയില്‍ ചേരാന്‍ കഴിയാത്ത സ്ഥിതിയാണ് ഉള്ളത്. ഇതേ പ്രശ്‌നം, കേന്ദ്ര സിലബസിലെ പന്ത്രണ്ടാം ക്ലാസ് വിദ്യാര്‍ത്ഥികളുടെ ഡിഗ്രി പ്രവേശനത്തിലുമുണ്ട്.
നിലവാരത്തില്‍ ഇന്ത്യയില്‍ ഒന്നാം സ്ഥാനത്തുള്ള കേന്ദ്ര സിലബസിലെ വിദ്യാര്‍ത്ഥികള്‍ക്ക് കേരളത്തില്‍ തന്നെ പഠിക്കാന്‍ കഴിയുന്ന സാഹചര്യം ഉണ്ടാക്കണമെന്ന് സിബിഎസ്ഇ സ്‌ക്കൂള്‍ മാനേജ്‌മെന്റ് അസോസിയേഷന്റെ ജനറല്‍ സെക്രട്ടറി പി എസ് രാമചന്ദ്രന്‍, വൈസ് പ്രസിഡണ്ട് ജെ എബ്രഹാം, സംസ്ഥാന കമ്മറ്റി അംഗം ജേക്കബ് ജോര്‍ജ്ജ് എന്നിവരാണ് ഗവര്‍ണര്‍ക്ക് നിവേദനം നല്കിയത്‌
പ്രതികരിക്കാൻ ഇവിടെ എഴുതുക: