മാലി: എടികെ മോഹന്‍ ബഗാന് എഎഫ്‌സി കപ്പില്‍ വിജയത്തുടക്കം. ഗ്രൂപ്പ് ഡിയിലെ ആദ്യ മത്സരത്തില്‍ ഏകപക്ഷീയമായ രണ്ട് ഗോളുകള്‍ക്ക്് ബെംഗളൂരു എഫ്‌സി യെ പരാജയപ്പെടുത്തി. റോയ് കൃഷ്ണയും സുബാശിഷ് ബോസുമാണ് എടികെ മോഹന്‍ ബഗാനായി ഗോളുകള്‍ നേടിയത്.
ഈ വിജയത്തോടെ എടികെ മോഹന്‍ ബഗാന് ഗ്രൂപ്പ് ഡിയില്‍ മൂന്ന് പോയിന്റായി. കളിയുടെ തുടക്കത്തില്‍ ഇരു ടീമുകളും കാര്യമായ നീക്കങ്ങള്‍ നടത്തിയില്ല. എന്നാല്‍ മത്സരം പുരോഗിച്ചതോടെ എടികെ മോഹന്‍ ബഗാന് പിടിമുറുക്കി. മുപ്പത്തിയൊമ്പതാം മിനിറ്റില്‍ അവര്‍ ലീഡും നേടി. സുബാശിഷ് ഘോഷ് ഗോള്‍ മുഖത്തേക്ക് ഹെഡ് ചെയ്ത് ഉയര്‍ത്തിവിട്ട പന്ത്, മാര്‍ക്ക് ചെയ്യപ്പെടാതെ നിന്ന റോയ് കൃഷ്്ണ തലവെച്ച്് ബെംഗളൂരുവിന്റെ വലയിലാക്കി. ഇടവേളയ്‌ക്ക് ജേതാക്കള്‍ 1- 0 ന് മുന്നില്‍ നിന്നു.
ഇടവേളയ്‌ക്ക് ശേഷം ആദ്യ മിനിറ്റില്‍ തന്നെ എടികെ മോഹന്‍ ബഗാന് രണ്ടാം ഗോളും നേടി. ഇത്തവണ സുബാശിഷ് ബോസാണ് സ്‌കോര്‍ ചെയ്്തത്്. പന്തടക്കത്തില്‍ ബെംഗളൂരുവാണ് ആധിപത്യം സ്ഥാപിച്ചത്. എന്നാല്‍ ഫിനിഷിങ്ങില്‍ പരാജയപ്പെട്ടു. ഒട്ടേറെ അവസരങ്ങള്‍ ലഭിച്ചെങ്കിലും അത് മുതലാക്കാന്‍ കഴിഞ്ഞില്ല. ക്യാപ്റ്റന്‍ സുനില്‍ ഛേത്രിക്കും മികവ് കാട്ടാനായില്ല. എടികെ മോഹന്‍ ബഗാന് രണ്ടാം മത്സരത്തില്‍ ശനിയാഴ്ച മാലിദീപിലെ മാസിയ സ്‌പോര്‍ട്‌സ് ആന്‍ഡ് റിക്രിയേഷന്‍ ക്ലബ്ബിനെ നേരിടും
പ്രതികരിക്കാൻ ഇവിടെ എഴുതുക: