തിരുവനന്തപുരം: മുഖ്യമന്ത്രി പിണറായി വിജയന്‍ വിദേശയാത്രയുടെ മറവില്‍ പണം കടത്തിയെന്ന ഗുരുതര വെളിപ്പെടുത്തലുമായി സ്വര്‍ണക്കടത്ത് കേസില്‍ അറസ്റ്റിലായ സരിത്. കസ്റ്റംസ് നല്‍കിയ കാരണം കാണിക്കല്‍ നോട്ടീസിനു നല്‍കിയ മറുപടിയിലാണ് ഇക്കാര്യമുള്ളത്. മുഖ്യമന്ത്രി യുഎഇ യാത്രയ്‌ക്കു പോയ സമയത്ത് സെക്രട്ടേറിയറ്റില്‍ നിന്ന് ഒരു പാക്കറ്റ് എടുക്കാന്‍ മറന്നെന്നും അതു എടുക്കണമെന്നും നിര്‍ദേശിച്ചത് കേസിലെ മറ്റൊരു പ്രതിയായ സ്വപ്‌നയാണ്.
സെക്രട്ടേറിയറ്റില്‍ എത്തി ജിഎഡിയിലെ ഹരികൃഷ്ണന്‍ എന്ന ഉദ്യോഗസ്ഥന്‍ ബ്രൗണ്‍ പേപ്പറില്‍ പൊതിഞ്ഞ വളരെ വലിയ ഒരു പാക്കറ്റ് തന്നെ ഏല്‍പ്പിച്ചു. തിരികെ കോണ്‍സുല്‍ ഓഫിസില്‍ എത്തിയ താന്‍ കൗതുകത്തിന്റെ പേരില്‍ എക്‌സ്‌റേ സ്‌കാനറില്‍ വച്ച് ആ പൊതി പരിശോധിച്ചപ്പോള്‍ അതു പണമാണെന്നും വ്യക്തമായി. ഈ പാക്കറ്റ് ഓഫിസിലെ അറ്റാഷയെ ഏല്‍പ്പിച്ചെന്നും അദ്ദേഹമാണ് അതു യുഎഇയിലേക്ക് നയതന്ത്ര പരിരക്ഷയുടെ മറവില്‍ എത്തിച്ചതെന്നും സരിത് എഴുതി നല്‍കിയ മൊഴിയില്‍ പറയുന്നു. ജോലി കൃത്യമായി ചെയ്തതിനെ സ്വപ്‌ന തന്നെ അഭിനന്ദിച്ചെന്നും സരിതിന്റെ മൊഴിയില്‍ പറയുന്നു.
പ്രതികരിക്കാൻ ഇവിടെ എഴുതുക: