ന്യൂദല്ഹി: കൊവാക്സിന്- കൊവിഷീല്ഡ് വാക്സിനുകളുടെ മിശ്രിത പരീക്ഷണം മികച്ച ഫലമാണ് കാണിക്കുന്നതെന്ന് ഇന്ത്യന് കൗണ്സില് ഓഫ് മെഡിക്കല് റിസര്ച്ച് (ഐസിഎംആര്). ഉത്തര്പ്രദേശില് അബദ്ധത്തില് രണ്ടുവാക്സിനുകള് ലഭിച്ച പതിനെട്ടു വ്യക്തികളില് നടത്തിയ പഠനത്തിലാണ് ഈ കണ്ടെത്തല്.
മിശ്രിതം നല്കുന്നത് സുരക്ഷിതമാണെന്ന് മാത്രമല്ല പ്രതിരോധശേഷി വര്ധിപ്പിക്കുകയും ചെയ്യും പഠനത്തില് പറയുന്നു. ഒരേ വാക്സിന്റെ തന്നെ രണ്ടു ഡോസുകള് നല്കുന്ന ഹോമോലോഗസ് സമീപനമാണ് ഇന്ത്യ പിന്തുടര്ന്നത്. എന്നാല് വാക്സിന് യജ്ഞത്തിനിടെ ഉത്തര്പ്രദേശില് 18 പേര്ക്ക് അബദ്ധത്തില് രണ്ടു വാക്സിനുകളുടെയും ഡോസുകള് നല്കി. ആദ്യ ഡോസ് കൊവിഷീല്ഡ് കുത്തിവെച്ചവര്ക്ക് രണ്ടാമത്തെ തവണ കൊവാക്സിനാണ് നല്കിയത്. ഇതേത്തുടര്ന്നാണ് പഠനം നടത്തിയത്.
ആല്ഫ, ബീറ്റ, ഡെല്റ്റ വകഭേദങ്ങള്ക്കെതിരേ രണ്ടു വ്യത്യസ്ത വാക്സിനുകളുടെ ഡോസുകള് ലഭിച്ചവര്ക്ക് പ്രതിരോധ ശക്തി കൂടുതലാണെന്ന് പഠനത്തില് കണ്ടെത്തി. ഇത് കൊവിഡ് പ്രതിരോധം കുറേക്കൂടി ശക്തമാക്കാന് സഹായിക്കുമെന്നാണ് വിലയിരുത്തല്. ചില വാക്സിനുകള് നേരിടുന്ന ക്ഷാമം പരിഹരിക്കാനും ഇത് സഹായിക്കും. തന്നെയുമല്ല വാക്സിന് സംബന്ധിച്ച് ജനങ്ങളുടെ മനസ്സില് നിലനില്ക്കുന്ന ആശങ്ക ദുരീകരിക്കാനും സാധിക്കും, പഠനത്തില് പറയുന്നു.
അതേസമയം സര്ക്കാര് ഇക്കാര്യത്തില് ഔദ്യോഗിക നിര്ദേശം നല്കുന്നത് വരെ സ്വയമേവ രണ്ടുവാക്സിനുകളുടെ ഡോസുകള് സ്വീകരിക്കരുതെന്നും നിര്ദേശമുണ്ട്. കഴിഞ്ഞ മാസമാണ് ഡിസിജിഐ വിദഗ്ധ പാനല് വാക്സിനുകളുടെ മിശ്രിത പരീക്ഷണത്തിന് ശുപാര്ശ ചെയ്യുന്നത്. ഇത്തരം പരീക്ഷണം നടത്തുന്നതിനായി വെല്ലൂര് ക്രിസ്ത്യന് മെഡിക്കല് കോളേജ് അനുമതി തേടിയതിന്റെ പശ്ചാത്തലത്തിലായിരുന്നു ശുപാര്ശ. ഒരു വ്യക്തിക്ക് രണ്ടു വാക്സിനുകളുടെയും ഓരോ ഡോസ് വീതം നല്കാന് കഴിയുമോ എന്ന് കണ്ടെത്താനാണ് പഠനം നടത്തുന്നതെന്ന് സെന്ട്രല് ഡ്രഗ്സ് സ്റ്റാന്ഡേര്ഡ് കണ്ട്രോള് ഓര്ഗനൈസേഷനിലെ വിദഗ്ധസമിതി പറഞ്ഞിരുന്നു.
