തൃശൂര്‍: ബാലഗോകുലത്തിന്റെ ഉപപ്രസ്ഥാനമായ ബാലസംസ്‌കാര കേന്ദ്രം ഏര്‍പ്പെടുത്തിയ ‘ജന്മാഷ്ടമി’ പുരസ്‌കാരത്തിന് കഥകളി നടന്‍ കലാമണ്ഡലം ഗോപി അര്‍ഹനായി. 50,000 രൂപയും ശില്‍പ്പവും പ്രശസ്തിപത്രവും അടങ്ങിയതാണ് അവാര്‍ഡ്.
ശ്രീകൃഷ്ണ ദര്‍ശനങ്ങളെ മുന്‍നിര്‍ത്തി സാഹിത്യം, കല, വൈജ്ഞാനിക രംഗങ്ങളില്‍ മികച്ച സംഭാവന ചെയ്തിട്ടുള്ള വ്യക്തികളെയാണ് പുരസ്‌കാരത്തിന് തെരഞ്ഞെടുക്കുന്നതെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. പ്രൊഫ.എം.ജി ശശിഭൂഷണ്‍, ഡി.നാരായണശര്‍മ്മ, ഡോ.ചാത്തനാട്ട് അച്ചുതനുണ്ണി എന്നിവരടങ്ങിയ സമിതിയാണ് അവാര്‍ഡ് നിര്‍ണയിച്ചത്.
ശ്രീകൃഷ്ണ ജയന്തിയോടനുബന്ധിച്ച് 26ന് തൃശൂരില്‍ നടക്കുന്ന സാംസ്‌കാരിക സമ്മേളനത്തില്‍ പുരസ്‌കാരം സമര്‍പ്പിക്കും. 25-ാമത് ‘ജന്മാഷ്ടമി’ പുരസ്‌കാരമാണ് ഇത്തവണത്തേത്. വാര്‍ത്താസമ്മേളനത്തില്‍ ബാലഗോകുലം മുന്‍സംസ്ഥാന അധ്യക്ഷന്‍ എന്‍.ഹരീന്ദ്രന്‍ മാസ്റ്റര്‍, പുരസ്‌കാര നിര്‍ണയ സമിതിയംഗം ഡി.നാരായണശര്‍മ്മ, ബാലഗോകുലം മുന്‍ സംസ്ഥാന ഖജാന്‍ജി കെ.എസ് നാരായണന്‍, തൃശൂര്‍ മേഖലാ ഖജാന്‍ജി വി.എന്‍ ഹരി എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: