കൊല്ലം : അക്ഷര മുത്തശി ഭാഗീരഥി അമ്മ അന്തരിച്ചു.107 വയസായിരുന്നു. വ്യാഴാഴ്ച രാത്രിയോടെയായിരുന്നു മരണം. നൂറ്റിയഞ്ചാം വയസില് നാലാംതരം തുല്യതാ പരീക്ഷയെഴുതി രാജ്യത്തിന്റെ വിദ്യാഭ്യാസ ചരിത്രത്തിന്റെ ഭാഗമായ വ്യക്തിയായിരുന്നു ഭാഗീരഥി അമ്മ. ലോകത്തെതന്നെ ഏറ്റവും പ്രായം ചെന്ന വിദ്യാര്ത്ഥിനി കൂടിയായിരുന്ന അവര് ഭാരതനാരീശക്തി പുരസ്കാര ജേതാവ് കൂടിയാണ്.
കൊല്ലം തൃക്കരുവാ പഞ്ചായത്തിലെ പ്രാക്കുളം സ്വദേശിനിയായ ഭാഗീരഥി അമ്മ നൂറ്റിയഞ്ചാം വയസിലും 275 മാര്ക്കില് 205 മാര്ക്കും നേടിയാണ് നാലാംതരം തുല്യതാ പരീക്ഷ ജയിച്ചത്. നൂറ്റിയഞ്ചാം വയസില് തുല്യതാ പരീക്ഷ പാസായ ഭാഗീരഥിയമ്മയെ കുറിച്ച് പ്രധാനമന്ത്രി മന്കീ ബാത്തിലും പരാമര്ശിച്ചിരുന്നു.
ഇളയ സഹോദരങ്ങളെ പരിപാലിക്കേണ്ടതിനാല് ഒമ്പതാം വയസില് ഭഗീരഥി അമ്മ പഠനം ഉപേക്ഷിക്കുകയായിരുന്നു. വര്ഷങ്ങള് കഴിഞ്ഞതോടെ അക്ഷരങ്ങളുമായുള്ള ബന്ധം കുറഞ്ഞു. മുപ്പതുകളില് വിധവയായതോടെ ആറ് മക്കളെ വളര്ത്തുന്നതിന്റെ ഉത്തരവാദിത്തവും ഏറ്റെടുക്കേണ്ടിവന്നു. തുടര്ന്നാണ് നൂറ്റിയഞ്ചാം വയസില് നാലാംതരം തുല്യത പരീക്ഷ പഠിച്ച് പാസാകുന്നത്.
ടൈംസ് ഓഫ് ഇന്ത്യയിലെ റിപ്പോര്ട്ടിലൂടെയാണ് ലോകം ഭാഗീരഥി അമ്മയെ അറിഞ്ഞത്. തുടര്ന്ന് ജനപ്രതിനിധികളും, സാമൂഹിക-സാംസ്കാരിക പ്രവര്ത്തകരും അമ്മയെ വീട്ടിലെത്തി ആദരിക്കുകയും പ്രോത്സാഹിപ്പിക്കുകയും ചെയ്തു. ഭാഗീരഥി അമ്മയുടെ ഉറ്റ സുഹൃത്തും, അയല്ക്കാരിയും ആയിരുന്ന ശാരദ ടീച്ചറുടെ മകള് എസ്.എന്. ഷേര്ളി അമ്മയുടെ അധ്യാപികയും, മകളും, സുഹൃത്തുക്കളും ഈ ആഗ്രഹത്തിന് ഒപ്പം നിന്നു. അമ്മയുടെ ഇളയമകള് തങ്കമണി പിള്ളയും ഈ അമ്മയുടെ പഠനമോഹങ്ങള്ക്ക് സൗകര്യമൊരുക്കി.
ഏഴാംതരം തുല്യതാ പരീക്ഷയ്ക്കുള്ള ഓണ്ലൈന് പരിശീലനം നല്കി വരികയായിരുന്നു അധ്യാപികയായ ഷേര്ളി. എന്നാല് കഴിഞ്ഞ ഒരു മാസമായി നല്ല ക്ഷീണത്തിലും, അവശതയിലുമായിരുന്നു അമ്മ. വ്യാഴാഴ്ച രാത്രി 11.55 ഓടെ അന്ത്യം സംഭവിച്ചു. ഏഴാംതരം വിജയിച്ച്, പത്താംതരം പരീക്ഷ എഴുതണമെന്നതും, നടന് സുരേഷ് ഗോപിയെ നേരില് കണ്ട് സംസാരിക്കണമെന്ന മോഹവും ബാക്കി വച്ചാണ് അമ്മലോകത്തു നിന്നും വിടവാങ്ങിയത്.
പരേതനായ രാഘവന്പിള്ളയാണ് ഭര്ത്താവ്. പത്മാക്ഷി അമ്മ, തുളസീധരന് പിള്ള, പരേതയായ കൃഷ്ണമ്മ, സോമനാഥന് പിള്ള, അമ്മിണി അമ്മ, തങ്കമണി എ. പിള്ള എന്നിവരാണ് മക്കള്. മരുമക്കള് ബാലകൃഷ്ണപിള്ള, (പരേതന്) വിജയലക്ഷ്മി അമ്മ, രാധാകൃഷ്ണപിള്ള (പരേതന്) മണിയമ്മ, ശ്രീധരന് പിള്ള, ആനന്ദന് പിള്ള (പരേതന്)
