കൊച്ചി: നെടുമ്പാശേരി വിമാനത്താവളത്തില്‍ വീണ്ടും വന്‍ മയക്കുമരുന്ന് വേട്ട. അന്താരാഷ്‌ട്ര വിപണിയില്‍ 28 കോടി രൂപ വില വരുന്ന 4.640 കിലോഗ്രാം ഹെറോയിനുമായി ആഫ്രിക്കന്‍ രാജ്യമായ ടാന്‍സാനിയന്‍ സ്വദേശി അഷറഫ് ടോറോ സാഫി (32) ഡയറക്ടറേറ്റ് ഓഫ് റവന്യൂ ഇന്റലിജന്‍സിന്റെ (ഡിആര്‍ഐ) പിടിയിലായി. ട്രോളി ബാഗിനടിയില്‍ പ്രത്യേക അറയുണ്ടാക്കി ഹെറോയിന്‍ സൂക്ഷിച്ചിരിക്കുകയായിരുന്നു. ഇന്നലെ പുലര്‍ച്ചെ രണ്ടരയോടെ കൊച്ചിയിലെത്തിയ എമിറേറ്റ്‌സ് വിമാനത്തിലാണ് ഇയാള്‍ എത്തിയത്.
ടാന്‍സാനിയയിലെ സാന്‍സിബാര്‍ വിമാനത്താവളത്തില്‍ നിന്നു ദുബായ് വഴിയാണ് ഇയാള്‍ കൊച്ചിയിലേക്ക് വന്നത്. ദല്‍ഹിയിലേക്ക് കൊണ്ടുപോകുന്നതിനാണ് ഹെറോയിന്‍ കൊച്ചിയിലെത്തിച്ചതെന്ന് ഇയാള്‍ വ്യക്തമാക്കി. ദല്‍ഹിയില്‍ പരിശോധന കര്‍ശനമായതിനാലാണ് മയക്കുമരുന്ന് ലോബി കൊച്ചി വിമാനത്താവളത്തെ ആശ്രയിക്കുന്നതെന്നും പറയുന്നു. എമിഗ്രേഷന്‍ പരിശോധനയ്‌ക്ക് ശേഷമാണ് ഡിആര്‍ഐ ഇയാളില്‍ നിന്നു മയക്കുമരുന്ന് കണ്ടെത്തിയത്. പിടികൂടിയ ഹെറോയിന്‍ പരിശോധിക്കുന്നതിന് ലാബിലേക്ക് അയച്ചിരിക്കുകയാണ്.
കഴിഞ്ഞ 22ന് കൊച്ചി വിമാനത്താവളത്തില്‍ സിംബാബ്‌വെ സ്വദേശിനി ഷാരോണ്‍ ചിഗ്വാസയും കോടികള്‍ വില വരുന്ന ഹെറോയിനുമായി പിടിയിലായിരുന്നു. ദോഹ വഴിയെത്തിയ ഷാരോണ്‍ ഇവിടെ നിന്ന് ബെംഗളൂരു വഴി ദല്‍ഹിക്ക് പോകാന്‍ ശ്രമിക്കുന്നതിനിടെയാണ് ബാഗേജ് പരിശോധനയ്‌ക്കിടെ സിയാല്‍ സുരക്ഷാ വിഭാഗം പിടികൂടിയത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: