ആലപ്പുഴ: എക്‌സല്‍ ഗ്ലാസസ് എല്‍ഡിഎഫ് പ്രഖ്യാപനം നടപ്പാക്കാതെ സര്‍ക്കാര്‍ തൊഴിലാളികളെ കബളിപ്പിക്കുന്നു. സ്ഥാപനം സര്‍ക്കാര്‍ ഏറ്റെടുത്ത് പ്രവര്‍ത്തിപ്പിക്കുമെന്നായിരുന്നു ഇടതുമുന്നണിയുടെ വാഗ്ദാനം.
ഫര്‍ണസ് തകരാര്‍ പരിഹരിക്കാര്‍ നിര്‍ത്തിയ സ്ഥാപനം 2012 ഡിസംബര്‍ 12 ഓടെ അടച്ച് പൂട്ടി. സര്‍ക്കാര്‍ സ്ഥാപനങ്ങളായ കെഎസ്‌ഐഡിസി, കെഎഫ്‌സി എന്നി സ്ഥാപനങ്ങളില്‍ നിന്ന്‌കോടിക്കണക്കിന് രൂപ വായ്പ എടുത്തിട്ട് ഒരു ഇന്‍സ്റ്റാള്‍മെന്റ് പോലും സ്ഥാപനം പ്രവര്‍ത്തിച്ച കാലയളവില്‍തിരിച്ചടച്ചില്ല . തൊഴിലാളികളെയും സര്‍ക്കാരിനെയും കബിളിപ്പിച്ച് ആസ്തികള്‍ വിറ്റ് കൊണ്ടുപോകാനുള്ള മാനേജ്‌മെന്റിന്റെ ശ്രമം തൊഴിലാളികളുടെ നിയമപരവും അല്ലാത്തതുമായ ഇടപെടല്‍ മൂലം തടസപ്പെട്ടിരിക്കുകയാണ്.
99. 45 കോടി ആദ്യ ലേല തുകയായ് നിശ്ചയിച്ചിരുന്നത് പിന്നീട് പത്ത് കോടിയോളം കുറച്ചു. ആറ് തവണ ലേലങ്ങള്‍ നടത്തി. ഇപ്പോള്‍ പതിനൊന്ന് കോടിയോളം രൂപ വിലമതിക്കുന്ന കുപ്പികള്‍ കടത്തി കൊണ്ട് പോകാനുള്ള ശ്രമത്തിലാണ് അധികൃതരെന്നാണ് ആക്ഷേപം. സ്ഥാപനം പൂട്ടുമ്പോള്‍ ഉണ്ടായിരുന്ന തൊഴിലാളികളില്‍ ഇരുപതിനടുത്ത് തൊഴിലാളികള്‍ ഒരാനുകൂല്യവും വങ്ങാനാവാതെ മരിച്ചു. 200 ലധികം തൊഴിലാളികള്‍ 58 വയസ്സ് കഴിഞ്ഞവരാണ്.
തൊഴിലാളികളുടെ ഏക പ്രതിക്ഷ സര്‍ക്കാരിലാണെങ്കിലും സര്‍ക്കാര്‍ വിഷയത്തില്‍ മൗനം പാലിക്കുകയാണ്. സര്‍ക്കാര്‍ സ്ഥാപനങ്ങള്‍ കൊടുത്ത ലോണുകള്‍, ടാക്‌സ് കുടിശിഖ, വൈദ്യൂതി കുടിശിഖ എന്നി ഇനത്തില്‍ ലഭിക്കാനുള്ള പണം മുതല്‍ കൂട്ടാക്കി സര്‍ക്കാര്‍ സ്ഥാപനം ഏറ്റെടുക്കണമെന്നാണ് ആവശ്യം ഉയരുന്നത്. എല്‍ഡിഎഫിന്റെ പ്രഖ്യാപിത നിലപാട് നടപ്പാക്കണമെന്ന് എക്‌സല്‍ ഗ്ലാസസ് എംപ്ലോയിസ് യൂണിയന്‍ സെക്രട്ടറി ആര്‍ അനില്‍കുമാര്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: