ന്യൂദല്‍ഹി : ടിബറ്റ് ആത്മീയാചാര്യന് ദലൈ ലാമയ്‌ക്ക് പിറന്നാള്‍ ആശംസിച്ച് പ്രധാനമന്ത്രി നരേന്ദ്രമോദി. ഇന്ന് 86ാം പിറന്നാള്‍ ആഘോഷിക്കുന്ന ദലൈലാമയെ ഫോണില്‍ വിളിച്ച് ആയുരാരോഗ്യ സൗഖ്യങ്ങള്‍ നേരുന്നതായും പ്രധാനമന്ത്രി അറിയിച്ചു. ഇരുവരും ഫോണിലൂടെ 20മിനിട്ടോളം സംസാരിച്ചതായാണ് റിപ്പോര്‍ട്ട്.
പിറന്നാള്‍ ദിനത്തില്‍ നിരവധി പ്രമുഖരാണ് ദലൈലാമയ്‌ക്ക് ആശംസകള്‍ അര്‍പ്പിച്ചത്. ധര്‍മ്മശാലയിലെ ആത്മീയ കേന്ദ്രത്തില്‍ നിന്നും ആശംസകള്‍ അറിയിച്ച എല്ലാവര്‍ക്കും ഓണ്‍ലൈനിലൂടെ ദലൈ ലാമ നന്ദി അറിയിക്കുകയും ചെയ്തു. ടിബറ്റിന്റെ ആത്മീയാചാര്യ പദവിയിലിരിക്കുന്ന 14-ാമത്തെ പ്രമുഖ വ്യക്തിത്വമാണ് ദലൈ ലാമ.
സ്വന്തം മണ്ണില്‍ നിന്നും പുറത്താക്കപ്പെട്ട ദലൈലാമയ്‌ക്ക് ഇന്ത്യയാണ് അഭയം നല്‍കിയത്. തന്റെ പിന്‍ഗാമി ഇന്ത്യയില്‍ നിന്നായിരിക്കുമെന്ന് 2019ല്‍ ദലൈലാമ അറിയിച്ചിരുന്നു. തനിക്ക് ശേഷം ചൈന ഉയര്‍ത്തിക്കൊണ്ടുവരുന്ന പിന്‍ഗാമിയെ വിശ്വാസികള്‍ അംഗീകരിക്കില്ലെന്നും ദലൈലാമ പറഞ്ഞിരുന്നു. എന്നാല്‍ ചൈന ഇത് തള്ളുകയാണ് ചെയ്തത്.
പ്രതികരിക്കാൻ ഇവിടെ എഴുതുക: