ശ്രീനഗര്‍ : ജമ്മു കശ്മീരില്‍ ലഷ്‌കര്‍ ഇ തോയ്ബ കമാന്‍ഡറെ സുരക്ഷാ സൈന്യം ഏറ്റുമുട്ടലില്‍ വധിച്ചു. പാക്ബന്ധമുള്ള ഭീകരനും ലഷ്‌കറിന്റെ സുപ്രധാന നേതാക്കളിലൊരാളായ നദീം അബ്രാറും കൊല്ലപ്പെട്ടിട്ടുണ്ട്. ദേശീയപാതയില്‍ വിന്യസിച്ച ജമ്മു കശ്മീരിലെ പോലീസ് സേനയും സിആര്‍പിഎഫും സംയുക്തമായി നടത്തിയ നീക്കത്തിലാണ് ഭീകരരെ വധിക്കാനായത്.
ശ്രീനഗറിലെ മലൂറ പരിംപോരയില്‍ നടന്ന ഏറ്റുമുട്ടലിലാണ് രണ്ടു ഭീകരരും കൊല്ലപ്പെട്ടത്. ദേശീയപാതയില്‍ ഭീകരര്‍ ആക്രമണത്തിന് പദ്ധതിയിടുന്നു എന്ന് രഹസ്യവിവരം ലഭിച്ചതിനെ തുടര്‍ന്നാണ് സുരക്ഷാ സൈനികര്‍ പ്രദേശത്ത് തെരച്ചില്‍ നടത്തി വരികയായിരുന്നു. പരിശോധനയ്‌ക്കിടെ തടഞ്ഞു നിര്‍ത്തിയ ഒരു വാഹനത്തില്‍ ഉണ്ടായിരുന്നവരോട് സുരക്ഷാ സേന തിരിച്ചറിയല്‍ രേഖകള്‍ ആവശ്യപ്പെട്ടു.
ഈ സമയം പിന്‍സീറ്റില്‍ ഇരുന്നയാള്‍ ഒരു ബാഗ് തുറന്ന് ഗ്രനേഡ് കൈയ്യിലെടുത്തു. അതിവേഗം പ്രവര്‍ത്തിച്ച സുരക്ഷാ സേന ഇയാളെ പിടികൂടി. ഡ്രൈവറോടൊപ്പം പോലീസ് സ്റ്റേഷനില്‍ എത്തിച്ച് പരിശോധിച്ചപ്പോള്‍ ഇയാള്‍ ലഷ്‌കര്‍ കമാന്‍ഡര്‍ അബ്രാര്‍ ആണെന്ന് തിരിച്ചറിയുകയായിരുന്നു.
തുടര്‍ന്ന് നടത്തിയ ചോദ്യം ചെയ്യലില്‍ ഒരു വീട്ടില്‍ ആയുധങ്ങള്‍ ഒളിപ്പിച്ചതായി അബ്രാര്‍ വെളിപ്പെടുത്തിയതിന് പിന്നാലെ തെരച്ചിലിനായി എത്തിയതായിരുന്നു സുരക്ഷ സേന. അബ്രാറുമായി സംഘം വീടിനകത്തേക്ക് പ്രവേശിച്ചപ്പോള്‍ ഒളിച്ചിരുന്ന ഭീകരന്‍ വെടിയുതിര്‍ക്കുകയായിരുന്നു. സൈന്യം നടത്തിയ പ്രത്യാക്രമണത്തിലാണ് അബ്റാറും പാക് ഭീകരനും കൊല്ലപ്പെട്ടതെന്ന് കശ്മീര്‍ ഐജി പി. വിജയ് കുമാര്‍ പറഞ്ഞു.
പ്രദേശത്ത് നടത്തിയ തെരച്ചിലില്‍ എകെ 47 തോക്കുകളും ഗ്രനേഡുകളും കണ്ടെടുത്തതായി വിജയ് കുമാര്‍ അറിയിച്ചു. കൊല്ലപ്പെട്ടവര്‍ക്ക് നിരവധി ആക്രമണങ്ങളില്‍ പങ്കുള്ളതായും അന്വേഷണ സംഘം അറിയിച്ചു. സുരക്ഷാ സൈന്യം ഇപ്പോഴും തെരച്ചില്‍ നടത്തി വരികയാണ്.
പ്രതികരിക്കാൻ ഇവിടെ എഴുതുക: