തിരുവനന്തപുരം: വടകര മണ്ഡലത്തില്‍നിന്ന് വിജയിച്ച ആര്‍എംപിയുടെ എംഎല്‍എ കെ കെ രമ നിയസഭയില്‍ സത്യപ്രതിജ്ഞയ്‌ക്ക് എത്തിയത് നെഞ്ചില്‍ ടി പി ചന്ദ്രശേഖരന്റെ ചിത്രം ബാഡ്ജായി ധരിച്ച്. സഗൗരവം ആണ് രമ സത്യപ്രതിജ്ഞ ചെയ്തത്. നിറഞ്ഞ കയ്യടികളോടെ പ്രതിപക്ഷ എംഎല്‍എമാര്‍ രമയെ സ്വീകരിച്ചു. ആര്‍എംപിയുടെ ആശയങ്ങള്‍ക്ക് അനുസൃതമായിട്ടുള്ള നിലപാടായിരിക്കും സഭയില്‍ സ്വീകരിക്കുകയെന്ന് രമ നേരത്തേ വ്യക്തമാക്കിയിരുന്നു.
യോജിക്കാവുന്ന വിഷയങ്ങളില്‍ പ്രതിപക്ഷത്തിനൊപ്പം നില്‍ക്കുമെന്നും അവര്‍ പറഞ്ഞിരുന്നു. യുഡിഎഫ് പിന്തുണയോടെയായിരുന്നു ഇത്തവണ കെ കെ രമ വടകരയില്‍ സ്ഥാനാര്‍ഥിയായത്. മഞ്ചേശ്വരം എംഎല്‍എ എ കെ എം അഷ്‌റഫ് ദൈവനാമത്തില്‍ കന്നഡയില്‍ സത്യപ്രതിജ്ഞ ചെയ്തപ്പോള്‍ പാലായില്‍നിന്നുള്ള മാണി സി കാപ്പനും മൂവാറ്റുപുഴ എംഎല്‍എ മാത്യു കുഴല്‍നാടനും ഇംഗ്ലീഷിലായിരുന്നു സത്യവാചകം ചൊല്ലിയത്. പതിനഞ്ചാം നിയമസഭയുടെ ആദ്യ സമ്മേളനത്തിനാണ് തിങ്കളാഴ്ച തുടക്കമായത്.
പ്രതികരിക്കാൻ ഇവിടെ എഴുതുക: