കൊച്ചി: കൊവിഡ് പ്രോട്ടോക്കോളും ട്രിപ്പിള് ലോക്ഡൗണും നിലനില്ക്കേ അഞ്ഞൂറിലേറെ പേരെ പങ്കെടുപ്പിച്ചുള്ള പിണറായി സര്ക്കാരിന്റെ സത്യപ്രതിജ്ഞ ചടങ്ങിനെ വിമര്ശിച്ച് എറണാകുളം അങ്കമാലി അതിരൂപത മുഖപത്രം സത്യദീപം. ‘ഇരട്ടനീതിയുടെ ഇളവുകള്’ എന്ന തലക്കെട്ടിലുള്ള മുഖപ്രസംഗത്തില് മുഖ്യമന്ത്രിയുടെ ന്യായീകരണം കൊവിഡിന് തിരിഞ്ഞോ എന്നും അതിരൂപത വിമര്ശിക്കുന്നു. കൊവിഡ് പ്രോട്ടോക്കോളില് ഇളവ് നല്കിയത് ജനവിരുദ്ധമാണെന്നും ഇരട്ടനീതിയുടെ രാഷ്ട്രീയമാണെന്നും മുഖപ്രസംഗം കുറ്റപ്പെടുത്തുന്നു.
ലോക്ഡൗണില് അകത്തിരിക്കാന് നിര്ബന്ധിതരായ ജനങ്ങള്ക്ക് തെറ്റായ സന്ദേശം നല്കുന്നതാണ് ഈ ആഘോഷമെന്നും മുഖപ്രസംഗം കുറ്റപ്പെടുത്തുന്നു. എന്. രമണ സുപ്രീംകോടതി ചീഫ് ജസ്റ്റിസായി അധികാരമേറ്റത് മുപ്പത് പേര് മാത്രം പങ്കെടുത്ത ചടങ്ങിലാണെന്നും അതിരൂപത ചൂണ്ടിക്കാട്ടുന്നു.
സാധാരണക്കാരുടെ മൃതസംസ്ക്കാര ശുശ്രൂഷയില് ഇരുപത് പേരെ കര്ശനമായി നിജപ്പെടുത്തുമ്പോള്, വിഐപികളുടെ വിടവാങ്ങലിന്ആള്ക്കൂട്ടമനുവദിക്കുന്ന നിലപാട് മാറ്റം നിലവാരമില്ലാത്തതാണ്. കൊവിഡ് പതാക ഇപ്പോഴും ഉയരെപ്പറക്കുമ്പോള് ഈ സത്യപ്രതിജ്ഞാഘോഷം അനൗചിത്യമാണെന്നും സത്യദീപം മുഖപ്രസംഗത്തിലൂടെ വിമര്ശിക്കുന്നു.
തെരഞ്ഞെടുപ്പുത്സവത്തിന്റെ ഭാഗമായി ‘ഉയര്ത്തിക്കെട്ടിയ’ കൊവിഡ് പതാക ഇപ്പോഴും ഉയരെപ്പറക്കുമ്പോള് ലോക്ഡൗണിലൂടെ അകത്തിരിക്കാന് നിര്ബന്ധിതരായ ജനങ്ങള്ക്ക് തെറ്റായ സന്ദേശം നല്കുന്ന ഈ സത്യപ്രതിജ്ഞാഘോഷം മിതമായ ഭാഷയില് പറഞ്ഞാല് അനൗചിത്യമാണ്. 500 പേരെ പങ്കെടുപ്പിച്ച് ‘ലളിതമായി’നടത്തുന്ന ചടങ്ങിന്റെ ഭരണഘടനാ ബാധ്യതാന്യായം അരമണിക്കൂറിലേറെ സമയമെടുത്ത് മുഖ്യമന്ത്രി വാര്ത്താസമ്മേളനത്തില് വിശദീകരിച്ചപ്പോള് ജനങ്ങള്ക്ക് വേഗം ‘മനസ്സിലായി’ പക്ഷേ, കൊവിഡിന് അത് തിരിഞ്ഞോ എന്തോ?
രോഗവും മരണവും അതിവേഗം കുതിക്കുമ്പോള് ഭരണകൂടം എന്തു ചെയ്തുവെന്ന ചോദ്യം ചരിത്രമാകുമ്പോള് ജനപക്ഷത്തു നിന്നൊരു മറുപടിയും നടപടിയുമാണ് നാടിന്റെ ഭാവി ഭാഗധേയത്തിനാധാരം. നാട്ടുകാരെ അകത്തിരുത്തി നേതാക്കള് പുറത്തിറങ്ങുന്ന, ഇളവുതേടുന്ന രാഷ്ട്രീയം ആരോഗ്യരാഷ്ട്രത്തെയാണ് ഇറക്കിവിടുന്നതെന്ന് മറക്കരുത്, മുഖപ്രസംഗം പറയുന്നു.
ജന്മഭൂമി ഓണ്ലൈന്