തിരുവനന്തപുരം: പ്രോട്ടോകോള് ലംഘിച്ചും അഞ്ഞൂറോളം പേരെ പങ്കെടുപ്പിച്ചും സെന്ട്രല് സ്റ്റേഡിയത്തില് സത്യപ്രതിജ്ഞാ ചടങ്ങ് നടത്തുന്നത് ജനദ്രോഹവും വെല്ലുവിളിയുമാണെന്ന് ബിജെപി മുന് സംസ്ഥാന അധ്യക്ഷന് കുമ്മനം രാജശേഖരന് അഭിപ്രായപ്പെട്ടു. വളരെയേറെ ബുദ്ധിമുട്ടുകള് സഹിച്ച് ട്രിപ്പിള് ലോക്ഡൗണിനോട് ജനങ്ങള് സഹകരിക്കുമ്പോള്, അതൊന്നും വകവെയ്ക്കാതെ പ്രോട്ടോകോള് ലംഘിച്ചും നൂറുകണക്കിന് ആള്ക്കാരെ പങ്കെടുപ്പിച്ചും സെന്ട്രല് സ്റ്റേഡിയത്തില് സത്യപ്രതിജ്ഞാ ചടങ്ങ് നടത്തുന്നത് കടുത്ത ജനദ്രോഹവും വെല്ലുവിളിയുമാണ്.
ഭരണഘടനയോടും നിയമവാഴ്ചയോടും പ്രതിബദ്ധത പ്രഖ്യാപിക്കുന്ന സത്യപ്രതിജ്ഞാ ചടങ്ങ്, നഗ്നമായ നിയമലംഘനത്തിന്റെ വിളംബരമായി മാറുന്നത് അക്ഷന്തവ്യമായ അപരാധമാണ്. ലോക്ക്ഡൗണിന്റെ കാര്ക്കശ്യവും പിരിമുറുക്കവും മൂലം ജനങ്ങള് വല്ലാതെ വലയുന്ന സന്ദര്ഭമാണിത്. സാമ്പത്തിക നഷ്ടവും തൊഴില് നിഷേധവും മൂലമുള്ള പ്രതിസന്ധികളും പ്രയാസങ്ങളും അവര് ക്ഷമയോടെ സഹിക്കുന്നു.
ജനങ്ങള് ഒരു വശത്ത് അച്ചടക്കത്തോടെ പ്രോട്ടോക്കോള് പാലിക്കുമ്പോള് അതിനെല്ലാം ആഹ്വാനം ചെയ്തും നിയമങ്ങള് ഉണ്ടാക്കിയും ഭരണസിരാകേന്ദ്രത്തില് അധികാരം കൈയാളുന്നവര് പരസ്യമായി അത് ലംഘിക്കുകയാണ്. തെറ്റായ സന്ദേശമാണ് സമൂഹത്തിന് നല്കുന്നത്. നിയമത്തിന്റെ സംരക്ഷകര് ലംഘകരായി മാറുന്ന കാഴ്ച വേദനാജനകമാണ്. രാജ്ഭവനില് ചടങ്ങ് നടത്തുന്നതിനും ഓണ്ലൈനിലൂടെ ജനങ്ങള്ക്ക് ചടങ്ങ് വീക്ഷിക്കുന്നതിനും വേണ്ട സംവിധാനങ്ങള് ഒരുക്കാവുന്നതേയുള്ളു. ഈ വൈകിയ വേളയിലെങ്കിലും തീരുമാനം പുനഃപരിശോധിക്കണം, കുമ്മനം ആവശ്യപ്പെട്ടു.
ജന്മഭൂമി ഓണ്ലൈന്