ന്യൂദല്ഹി: സിബിഎസ്ഇ പത്താംക്ലാസ് വിദ്യാര്ഥികളുടെ മാര്ക്ക് അപ്ലോഡ് ചെയ്യാന് സ്കൂളുകള്ക്ക് ജൂണ് 30 വരെ സമയം നീട്ടി. ഇതോടെ ഫലപ്രഖ്യാപനവും വൈകും. ജൂലായ് മാസം ഫലം വരാനാണ് സാധ്യത.
നേരത്തെ ജൂണ് 11-നകം മാര്ക്കുകള് സമര്പ്പിച്ച് ജൂണ് മൂന്നാംവാരത്തിനുള്ളില് ഫലം പ്രഖ്യാപിക്കുമെന്ന് സിബിഎസ്ഇ വ്യക്തമാക്കിയിരുന്നു. ‘ഈ മഹാമാരിക്കാലത്ത് പല സംസ്ഥാനങ്ങളും ലോക്ഡൗണ് പ്രഖ്യാപിച്ചിരിക്കുകയാണ്. ഈ സാഹചര്യത്തില് സിബിഎസ്ഇ സ്കൂളുകളുടെയും അധ്യാപകരുടെയും സുരക്ഷ മാനിച്ച് വിദ്യാര്ഥികളുടെ മാര്ക്ക് സമര്പ്പിക്കാനുള്ള തീയതി നീട്ടുകയാണെന്ന്’ സി.ബി.എസ്.ഇ കണ്ട്രോളര് ഓഫ് എക്സാമിനേഷന്സ് സന്യം ഭരദ്വാജ് അറിയിച്ചു.
കൊവിഡ്-19 രോഗബാധയുടെ പശ്ചാത്തലത്തില് മേയ് നാലിന് നടത്താനിരുന്ന പത്താക്ലാസ്സ് പരീക്ഷ സിബിഎസ്ഇ റദ്ദാക്കിയിരുന്നു. അതിനാലാണ് വിദ്യാര്ഥികളുടെ അസൈന്മെന്റുകളും ക്ലാസ്സ് ടെസ്റ്റുകളുടെ മാര്ക്കും ഉപയോഗിച്ച് ഫലം മൂല്യനിര്ണയം നടത്താന് ബോര്ഡ് തീരുമാനിച്ചത്. എന്നാല് പന്ത്രണ്ടാം ക്ലാസ് പരീക്ഷയുടെ കാര്യത്തില് ഇതുവരെ അന്തിമ തീരുമാനമിയിട്ടില്ല.
