കൊച്ചി: കൊവിഡ് പ്രതിരോധത്തിന് കോര്പ്പറേഷനുമായി ദക്ഷിണ നാവിക സേന സഹകരിക്കും. ഇന്നലെ ദക്ഷിണ നാവിക സേന ആസ്ഥാനത്ത് ഫ്ളാഗ് ഓഫീസര് കമാന്റിങ് ഇന് ചീഫ് വൈസ് അഡ്മിറല് അനില്കുമാര് ചാവ്ല-യുമായി മേയര് നടത്തിയ കൂടികാഴ്ചയിലാണ് ഇക്കാര്യം വ്യക്തമാക്കിയത്. ഐഎന്എസ് കമ്മാന്റിങ് ഓഫീസര് കോമഡോര് അനില് ജോസ് ജോസഫുംകൂടിക്കാഴ്ചയില് പങ്കെടുത്തു.
കൊവിഡുമായി ബന്ധപ്പെട്ട് കൊച്ചി നഗരസഭ നടത്തുന്ന പ്രവര്ത്തനങ്ങള് മേയര് വിശദീകരിച്ചു. പ്രതിരോധ പ്രവര്ത്തനങ്ങളുമായി ബന്ധപ്പെട്ട എല്ലാ രക്ഷാ പ്രവര്ത്തനങ്ങളിലും സഹായിക്കാന് ഇന്ഡ്യന് നേവി സജ്ജമാണെന്ന് അദ്ദേഹം ഉറപ്പുനല്കി. കൊച്ചി നഗരസഭ നടത്തുന്ന വാക്സിനേഷന് ക്യാമ്പിന് നഴ്സിങ് സഹായം വേണ്ടിവന്നാല് അത് ഇന്ഡ്യന് നേവി നല്കും. ക്യാമ്പ് സംഘാടനത്തിനാവശ്യമായ വോളന്റിയര് പ്രവര്ത്തനത്തിലും നേവിയുടെ സഹകരണമുണ്ടാകും.
ഏതെങ്കിലും സാഹചര്യത്തില് ആശുപത്രി ബെഡ് ആവശ്യമായി വന്നാല് നാവികസേനയുടെ ഹോസ്പിറ്റലില് ചികിത്സ നല്കുന്നതിനുളള പൂര്ണ്ണമായ സഹകരണമുണ്ടാകും. വടക്കേ ഇന്ഡ്യയിലൊക്കെ ഉണ്ടായത് പോലുളള അപകടകരമായ സാഹചര്യം വന്നാല് നേരിടുന്നതിന് നേവി പൂര്ണ്ണ പരിശീലനം സിദ്ധിച്ച മെഡിക്കല് സ്റ്റാഫിനെ സജ്ജമാക്കും. കൊച്ചി നഗരസഭ തുടങ്ങുന്ന കോവിഡ് കണ്ട്രോള് റൂം സമയോചിത ഇടപെടല് ആണെന്ന് അറിയിക്കുകയും, കണ്ട്രോള് റൂം പ്രവര്ത്തനങ്ങളില് ആവശ്യമായ നിര്ദ്ദേശം നല്കുകയും ചെയ്തു. നഗരസഭയുടെ മൊബൈല് മെഡിക്കല് യൂണിറ്റിലെ ആംബുലന്സില് ആവശ്യമായ മരുന്ന് നേവി നല്കും. കൊവിഡ് ബാധിതര്ക്കായി കൊച്ചി നഗരസഭ ടിഡിഎം ഹാളില് നടത്തുന്ന ഭക്ഷണ വിതരണത്തിന് ആവശ്യമായ സഹായം നല്കാനും നേവി തയാറായി. നിലവില് ഓക്സിജന് സപ്ലൈ പോലുളള കാര്യങ്ങളില് ചീഫ് സെക്രട്ടറിയും ജില്ലാ ഭരണകൂടവും ആവശ്യപ്പെടുന്ന സഹായം നേവി നല്കുന്നുണ്ട്.
