ചെന്നൈ: നിയമ സഭാ തെരെഞ്ഞെടുപ്പില് തമിഴ്നാട്ടില് എം.കെ. സ്റ്റാലിന്റെ നേതൃത്വത്തില് ഡി.എം.കെ അധികാരത്തിലെത്തിയതോടെ നാവ് മുറിച്ച് ഡി.എം.കെ. അനുഭാവി. രാമനാഥപുരം ജില്ലയിലെ പരമക്കുടി സ്വദേശിയായ 32-കാരിയാണ് നാവ് മുറിച്ചെടുത്ത് ക്ഷേത്രത്തിലെത്തിയത്. വായില്നിന്ന് ചോരയൊലിക്കുന്ന നിലയില് കണ്ട യുവതിയെ നാട്ടുകാര് ചേര്ന്ന് ആശുപത്രിയിലെത്തിച്ചു.
തമിഴകത്ത് ഡി.എം.കെ. അധികാരത്തിലെത്തുകയാണെങ്കില് നാവ് മുറിച്ചെടുത്ത് ദൈവത്തിന് സമര്പ്പിക്കാമെന്ന് യുവതി നേരത്തെ തന്നെ തീരുമാനിച്ചിരുന്നു. തുടര്ന്നാണ് മുറിച്ചെടുത്ത നാവുമായി പരമക്കുടിയിലെ മുതലാമ്മാന് ക്ഷേത്രത്തിലെത്തിയത്.
ക്ഷേത്രം തുറക്കാത്തതിനാല് ഇവര്ക്ക് ഏറെനേരം പുറത്തുനില്ക്കേണ്ടിവന്നു. ഇതിനിടെയാണ് വായില്നിന്ന് ചോരയൊലിച്ച് നില്ക്കുന്ന യുവതിയെ നാട്ടുകാര് കണ്ടത്. ഉടന്തന്നെ നാട്ടുകാര് ചേര്ന്ന് യുവതിയെ സമീപത്തെ ആശുപത്രിയില് എത്തിക്കുകയായിരുന്നുവെന്ന് പ്രമുഖ മാധ്യമം റിപ്പോര്ട്ട് ചെയ്തു.
