കൊല്ലം: വോട്ടെണ്ണലിനോടനുബന്ധിച്ച് മെയ് ഒന്ന് മുതല് ഒമ്പതുവരെ ആഘോഷ പ്രകടനങ്ങള് ഒഴിവാക്കാന് രാഷ്ട്രീയപാര്ട്ടി പ്രതിനിധികളുടെ യോഗത്തില് തീരുമാനം. ഈ ദിവസങ്ങളില് റാലികള്, പ്രകടനങ്ങള്, പൊതുസ്ഥലങ്ങളിലെ ആഘോഷ പരിപാടികള് എന്നിവയൊന്നും ഉണ്ടാകില്ല.
24, 25 തീയതികളില് വാര്ഡ്, ബൂത്ത് തലങ്ങളിലും സര്ക്കാര്-സ്വകാര്യ സ്ഥാപനങ്ങളിലും ശുചീകരണ പ്രവര്ത്തനങ്ങള് നടത്തും.
പോലീസും റവന്യു അധികാരികളും സെക്ടറല് ഓഫീസര്മാരും ജില്ലയില് നടത്തുന്ന പരിശോധനകള് കൂടുതല് സൗഹാര്ദ്ദപരമാക്കാന് നടപടിയെടുക്കുമെന്ന് കളക്ടര് അറിയിച്ചു. വാക്സിന് നല്കുന്നതിന് ഓണ്ലൈനായി ടോക്കണ് സംവിധാനം ഏര്പ്പെടുത്തും. രണ്ടാമത്തെ ഡോസ് സ്വീകരിക്കുന്നവര്ക്കായിരിക്കും ഇതില് മുന്ഗണന. റംസാനുമായി ബന്ധപ്പെട്ട് ഇളവുകള് നല്കാനുള്ള നടപടിയുണ്ടാകും. വോട്ടെണ്ണല് സീറോ വേസ്റ്റ് തത്വമനുസരിച്ച് പൂര്ത്തിയാക്കും. കോവിഡ് മാനേജ്മെന്റ് കമ്മിറ്റികളില് പ്രവര്ത്തിക്കാനുള്ള സന്നദ്ധപ്രവര്ത്തകരെ ബൂത്ത് കമ്മിറ്റികളില് നിന്ന് നല്കാമെന്ന് രാഷ്ട്രീയ പണ്ടാര്ട്ടി പ്രവര്ത്തകര് അറിയിച്ചു.
കളക്ടര് അവതരിപ്പിച്ച നിര്ദ്ദേശങ്ങള് സ്വാഗതാര്ഹമാണെന്നും മാനദണ്ഡ പാലനം സംബന്ധിച്ച് പൂര്ണ സഹകരണം ഉറപ്പാക്കുമെന്നും രാഷ്ട്രീയകക്ഷി പ്രതിനിധികള് അറിയിച്ചു. ഓണ്ലൈനായി ചേര്ന്ന യോഗത്തില് സിറ്റി പോലീസ് കമ്മീഷണര് ടി. നാരായണന്, ജില്ലാ മെഡിക്കല് ഓഫീസര് ഡോ. ആര്. ശ്രീലത, രാഷ്ട്രീയ പാര്ട്ടി പ്രതിനിധികളായ വരദരാജന്, കെ. സുദേവന്, താമരക്കുളം സലിം, നയാസ് മുഹമ്മദ്, തൃദീപ് കുമാര്, കെ.എന്. മോഹന്ലാല്, വിജയകുമാര്, ലാലു, ഇക്ബാല് കുട്ടി, അജിത്, തെരഞ്ഞെടുപ്പ് വിഭാഗം സൂപ്രണ്ട് അജിത്ത് ജോയി തുടങ്ങിയവര് പങ്കെടുത്തു.
