ന്യൂദല്‍ഹി: കേന്ദ്രം വാക്‌സിന്‍ തരുന്നില്ല എന്ന കുറ്റപ്പെടുത്തല്‍ വാസ്തവവിരുദ്ധമെന്ന് കേന്ദ്രമന്ത്രി വി മുരളീധരന്‍. ഏപ്രില്‍ 21 വരെ 62,43,833 ഡോസ് വാക്‌സിന്‍ സംസ്ഥാനത്ത് വിതരണം ചെയ്തുകഴിഞ്ഞു. അടുത്ത നാലുദിവസത്തിനകം ആറരലക്ഷം ഡോസ് വാക്‌സിന്‍ കൂടി കേരളത്തിലെത്തുമെന്നും കേന്ദ്രമന്ത്രി വ്യക്തമാക്കി. ദല്‍ഹിയില്‍ മാധ്യമങ്ങളോട് സംസാരിക്കുകയായിരുന്നു അദേഹം.
കേരളത്തില്‍ വാക്‌സിന്‍ വിതരണകേന്ദ്രങ്ങളിലെ അരാജകത്വം അവസാനിപ്പിക്കണം. വാക്‌സിന്‍ വിതരണകേന്ദ്രങ്ങള്‍ സാമൂഹ്യവ്യാപന ഇടങ്ങളാകുന്ന സ്ഥിതിയാണുള്ളത്. ലഭ്യമായ വാക്‌സിന്റെ അളവനുസരിച്ച് വേണം ഗുണഭോക്താക്കളെ നിശ്ചയിക്കാനെന്നും മുരളീധരന്‍ പറഞ്ഞു. ഏപ്രില്‍ എട്ടു മുതലുള്ള കണക്കുകള്‍ പരിശോധിച്ചാല്‍ ശരാശരി ഒരു ലക്ഷത്തില്‍ താഴെ ഡോസുകളാണ് ഒരുദിവസം വിതരണം ചെയ്യാന്‍ കേരളത്തിന് സാധിക്കുക എന്നിരിക്കെ ഇതിന്റെ ഇരട്ടി ആളുകളെ വിതരണകേന്ദ്രങ്ങളില്‍ അനുവദിക്കുന്നത് ആരോഗ്യവകുപ്പിന്റെ പിടിപ്പുകേടാണെന്ന് മന്ത്രി കുറ്റപ്പെടുത്തി.
രോഗികളുടെ എണ്ണം കുതിച്ചുയരുന്ന പശ്ചാത്തലത്തില്‍ ഉത്തര്‍പ്രദേശിന്റെയും അസമിന്റെയും മാതൃക പിന്തുടര്‍ന്ന് പതിനെട്ട് വയസിന് മുകളില്‍ പ്രായമുള്ള എല്ലാവര്‍ക്കും സൗജന്യവാക്‌സിന്‍ ലഭ്യമാക്കാന്‍ കേരളം തയാറാകണം. കേരളത്തിന് ആവശ്യമായതിന്റെ ഇരട്ടിയിലധികം മെഡിക്കല്‍ ഓക്‌സിജന്‍ സ്‌റ്റോക്കുണ്ടെന്ന് വിതരണത്തിന്റെ ചുമതലയുള്ള കേന്ദ്രസര്‍ക്കാര്‍ സ്ഥാപനമായ പെസോ വ്യക്തമാക്കിയിട്ടുണ്ടെന്ന് അദ്ദേഹം ചൂണ്ടിക്കാട്ടി.
പ്രതികരിക്കാൻ ഇവിടെ എഴുതുക: