തിരുവനന്തപുരം: ശ്രീരാമദാസ മിഷന് യൂണിവേഴ്സല് സൊസൈറ്റിയുടെ ആഭിമുഖ്യത്തില് നടക്കുന്ന ശ്രീരാമനവമി രഥയാത്ര ഇന്ന് കൊല്ലൂര് ശ്രീ മൂകാംബികാ ദേവീക്ഷേത്രസന്നിധിയില്നിന്ന് ആരംഭിക്കും.
ശ്രീ മൂകാംബികാക്ഷേത്രത്തില് മുഖ്യതന്ത്രി പകര്ന്നു നല്കുന്ന ജ്യോതി ശ്രീരാമദാസാശ്രമം അധ്യക്ഷന് സ്വാമി ബ്രഹ്മപാദാനന്ദസരസ്വതി ശ്രീരാമരഥത്തില് പ്രതിഷ്ഠിച്ചുകൊണ്ട് രഥപരിക്രമണത്തിന് തുടക്കം കുറിക്കും. കൊവിഡ് സുരക്ഷാമാനദണ്ഡങ്ങള് പാലിച്ചുകൊണ്ടായിരിക്കും രഥയാത്രയെന്ന് ശ്രീരാമദാസ മിഷന് യൂണിവേഴ്സല് സൊസൈറ്റി അധ്യക്ഷന് എസ്. കിഷോര് കുമാര് അറിയിച്ചു.
ക്ഷേത്ര മാതൃകയില് നിര്മിച്ചിട്ടുള്ള ശ്രീരാമരഥത്തില് പഞ്ചലോഹ നിര്മിതമായ ശ്രീരാമസീത ആഞ്ജനേയ വിഗ്രഹം, ശ്രീരാമപാദുകം, ചൂഡാരത്നം എന്നിവയും ശ്രീരാമദാസാശ്രമ സ്ഥാപകാചാര്യന് നീലകണ്ഠഗുരുപാദരുടെയും സ്വാമി സത്യാനന്ദസരസ്വതികളുടെയും ഛായാചിത്രങ്ങളും നിത്യാരാധനയ്ക്കും ദര്ശനത്തിനുമായി ഉണ്ടാകും.
വിവിധ ജില്ലകളില് പര്യടനം നടത്തി 20ന് കന്യാകുമാരിയിലേക്ക് പോയി തിരികെ നെയ്യാറ്റിന്കര വഴി ചേങ്കോട്ടുകോണം ശ്രീരാമദാസാശ്രമത്തില് രഥയാത്ര സമാപിക്കും. ശ്രീരാമനവമി ദിനമായ ഏപ്രില് 21ന് ശ്രീരാമദാസ ആശ്രമത്തിലെ ജ്യോതിക്ഷേത്ര സന്നിധിയില് വൈകുന്നേരം 5.30ന് ശ്രീരാമനവമി സമ്മേളനം നടക്കും.
ജന്മഭൂമി ഓണ്ലൈന്