കൊച്ചി : ദുരുദ്ദേശത്തോടെ തന്നെ നിരവധി തവണ സപീക്കര് ശ്രീരാമകൃഷ്ണന് സ്വന്തം ഫ്ളാറ്റിലേക്ക് ക്ഷണിച്ചിട്ടുണ്ടെന്ന് സ്വപ്ന സുരേഷിന്റെ ഗുരുതര വെളിപ്പെടുത്തല്. ചാക്കയിലെ ഫ്ളാറ്റ് തന്റെ ഒളിസങ്കേതമാണെന്ന് സ്പീക്കര് പറഞ്ഞിട്ടുണ്ട്. നിരവധി തവണ വിളിച്ചിട്ടും അവിടേക്ക് താന് തനിച്ച് പോയിട്ടില്ലെന്നും അന്വേഷണ സംഘം മുമ്പാകെ സ്വപ്ന സുരേഷ് മൊഴി നല്കി.
സ്പീക്കറുടെ വ്യക്തി താത്പ്പര്യങ്ങള്ക്ക് കീഴ്പ്പെടാതിരുന്നതിനാല് മിഡില് ഈസ്റ്റ് കോളേജിന്റെ ചുമതലയില് നിന്ന് തന്നെ ഒഴിവാക്കി. എന്ഫോഴ്സ്മെന്റ് ഹൈക്കോടതിയില് സമര്പ്പിച്ച രണ്ടാം റിപ്പോര്ട്ടിലാണ് ഇതുസംബന്ധിച്ച് പ്രതിപാദിച്ചിരിക്കുന്നത്.
ഇത് കൂടാതെ യുഎഇ കോണ്സുലേറ്റില് നിന്ന് രാജിവെക്കുന്ന കാര്യം മുഖ്യമന്ത്രിയെ നേരില് കണ്ട് അറിയിച്ചിരുന്നതാണെന്നും സ്വപ്ന വെളിപ്പെടുത്തി. ആ സമയം മുഖ്യമന്ത്രിയുടെ ഓഫീസില് എം. ശിവശങ്കറിന്റെ ടീം ഉണ്ടായിരുന്നു. സി.എം. രവീന്ദ്രന്, ദിനേശന് പുത്തലത്തു അടക്കമുള്ള സംഘം ആയിരുന്നു ഇവര്. മുഖ്യമന്ത്രിയുടെ ഓഫീസിലെ ശിവശങ്കര് ടീം സര്ക്കാരിന്റെ പല പദ്ധതികളും ബിനാമി പേരുകളില് തട്ടിയെടുക്കുന്നുണ്ടെന്നും സ്വ്പനയുടെ മൊഴിയില് പരാമര്ശിക്കുന്നുണ്ട്.
