ഭോപ്പാല്: പരിക്കേറ്റ പൊലീസ് ഉദ്യോഗസ്ഥന് പ്രാഥമിക ശുശ്രൂഷ നല്കി ബിജെപിയുടെ രാജ്യസഭാ എംപി ജ്യോതിരാദിത്യ സിന്ധ്യ. ഭോപ്പാല് വിമാനത്താവളത്തില്നിന്ന് മധ്യമപ്രദേശ് മുഖ്യമന്ത്രി ശിവരാജ് സിംഗ് ചൗഹാന്റെ വസതിയിലേക്കുള്ള യാത്രയ്ക്കിടെയായിരുന്നു ഇതെന്ന് പാര്ട്ടി നേതാവ് അറിയിച്ചു.
‘ജ്യോതിരാദിത്യ സിന്ധ്യയുടെ വാഹനം മുഖ്യമന്ത്രിയുടെ വസതിയിലേക്ക് പോകുന്നതിനിടെ, ഇവിടെയായിരുന്നു ഇരുവരും ഒരുമിച്ച് ഉച്ചഭക്ഷണം നിശ്ചയിച്ചിരുന്നത്, സിന്ധ്യ വീണ് പരിക്കേറ്റ പൊലീസ് ഉദ്യോഗസ്ഥനെ കണ്ടു സഹായിക്കുകയായിരുന്നു. പിന്നീട് പൊലീസ് ഉദ്യോഗസ്ഥനെ ആശുപത്രിയില് പ്രവേശിപ്പിച്ചു.’- പാര്ട്ടിവക്താവ് പങ്കജ് ചതുര്വേദി പറഞ്ഞു. പൊലീസ് ഉദ്യോഗസ്ഥന് നെറ്റിയില് ചെറിയ പരിക്ക് മാത്രമേ പറ്റിയിരുന്നുള്ളൂ.
സിന്ധ്യ തൂവാലകൊണ്ട് മുറിവ് മൂടിപ്പിടിച്ചു നില്ക്കുന്ന വീഡിയോ സമൂഹമാധ്യമങ്ങളില് വൈറലായി. സിന്ധ്യക്കൊപ്പമുണ്ടായിരുന്ന വാഹനം ഇടിച്ചാണ് പൊലീസ് ഉദ്യോഗസ്ഥന് പരിക്കേറ്റതെന്ന ആരോപണം എസ്പി(വടക്ക്) വിജയ് ഖാത്രി നിഷേധിച്ചു. തലകറക്കത്തുടര്ന്നാണ് വീണതെന്നും സിന്ധ്യ സഹായിക്കുകയായിരുന്നുവെന്നും എസ്പി അറിയിച്ചു.
