കൊല്ലം: അഷ്ടമുടി കായലിലെ നിയമവിരുദ്ധമായ ചീനവലകള് വ്യാപകമായിട്ടും ഫിഷറീസ് വകുപ്പ് നടപടിയെടുക്കുന്നില്ലെന്ന് ആക്ഷേപം. കടവൂര്, പത്തായക്കല്ല്, അഷ്ടമുടി, പ്രാക്കുളം, ചവറ, കൊച്ചുതുരുത്ത്, തെക്കുംഭാഗം, സാമ്പ്രാണിക്കോടി, അരിനല്ലൂര് ഭാഗങ്ങളിലാണ് കായല്കയ്യേറി ചീനവലകള് വ്യാപകമായി സ്ഥാപിച്ചിരിക്കുന്നത്.
നീണ്ടകര അഴിമുഖത്തും കായലിന്റെ മധ്യഭാഗത്തുമുള്ള നികപ്പ് പ്രദേശത്തും അശാസ്ത്രീയമായ ഈ മത്സ്യബന്ധനം കായലില് മത്സ്യശോഷണത്തിന് പ്രധാനകാരണമാകുന്നതായി മത്സ്യതൊഴിലാളികള് പറയുന്നു. നിരോധിച്ച ചെറുകണ്ണി വലകള് ഉപയോഗിച്ച് മീന്പിടിക്കുന്നത് ഉള്നാടന് മത്സ്യത്തൊഴിലാളികള്ക്ക് മത്സ്യബന്ധനത്തിന് തടസ്സമാണ്. രാത്രികാലങ്ങളില് വള്ളങ്ങള് മരത്തൂണുകളില് ഇടിക്കുകയും തൊഴിലാളികള്ക്ക് പരിക്കേല്ക്കുകയും ചെയ്യുന്നത് പതിവ് സംഭവമായിട്ടുണ്ട്. കരയില് മാത്രമെ ചീനവല കെട്ടാവൂ എന്ന നിയമം മറികടന്ന് കായലിലേക്ക് കിലോമീറ്ററോളം മുളക്കഴകള് ഉയര്ത്തി സര്വീസ് വയര് വലിക്കുകയും 500 മുതല് 1000 വാട്സ് ബള്ബുകള് പലരും ഉപയോഗിക്കുകയും ചെയ്യുന്നു.
വലുതും ചെറുതുമായ മത്സ്യങ്ങളെല്ലാം അമിതവെളിച്ചം കണ്ട് വലയില് കുരുങ്ങുന്നു. ഇത് മത്സ്യവംശനശീകരണത്തിന് വഴിയൊരുക്കുന്നു. ഇത്തരം മത്സ്യബന്ധനം നടത്തുന്നവര് പരമ്പരാഗത മത്സ്യത്തൊഴിലാളി വിഭാഗത്തില് ഉള്പ്പെടുന്നവരല്ലെന്നതാണ് സൂചന. കായല് സമ്പത്ത് നശിപ്പിക്കുന്ന ഈ ചൂഷണം അനുവദിക്കാനാവില്ല. ഉള്നാടന് മത്സ്യബന്ധനത്തിന് തടസ്സമായ എല്ലാ ചീനവലകളും കായലില് നിന്നും നീക്കം ചെയ്യണമെന്നാണ് ഉയരുന്ന ആവശ്യം.
ജന്മഭൂമി ഓണ്ലൈന്