വാഷിങ്ടൺ ഡി.സി: ജോണ്സൺ ആന്റ് ജോണ്സൺ വികസിപ്പിച്ച കോവിഡ് വാക്സിന് മൂന്നാംഘട്ട ക്ലിനിക്കൽ പരീക്ഷണങ്ങളിൽ 66 ശതമാനം മാത്രം ഫലപ്രാപ്തി. മൂന്ന് രാജ്യങ്ങളിലായി 44,000 ഓളം പേരിലാണ് വാക്സിൻ പരീക്ഷിച്ചത്. ജനിതകമാറ്റം വന്ന വിവിധതരം കൊറോണ വൈറസുകളിൽ പരീക്ഷിച്ചപ്പോഴാണ് ഫലപ്രാപ്തി ഈ അളവിൽ ലഭിച്ചതെന്ന് കമ്പനി പുറത്തിറക്കിയ വാർത്താക്കുറിപ്പിൽ പറയുന്നു.
അമേരിക്കയിൽ വാക്സിൻ 72 ശതമാനവും ലാറ്റിനമേരിക്കയിൽ 66 ശതമാനവും ദക്ഷിണാഫ്രിക്കയിൽ 57 ശതമാനവും ഫലപ്രദമാണെന്നും കമ്പനി അറിയിച്ചു. അതെ സമയം ഗുരുതരമായ രോഗം ബാധിച്ച 85 ശതമാനം പേർക്ക് ഈ വാക്സിൻ ഫലപ്രദമാണ്. ഫൈസർ, മൊഡേണ എന്നിവയുടെ വാക്സിനുകളേക്കാൾ ഫലപ്രാപ്തി കുറവാണെങ്കിലും ഒറ്റ ഡോസ് മാത്രം മതി എന്നതാണ് ഈ വാക്സിനെ വ്യത്യസ്തമാക്കുന്നത്. അത് പോലെ സാധാരണ റഫ്രിജറേറ്ററിൽ വാക്സിൻ സൂക്ഷിക്കാം.
ആഴ്ചകൾക്കുള്ളിൽ അംഗീകാരം ലഭിച്ചേക്കും. 100 മില്യൺ ഡോസ് നൽകാമെന്ന കരാറിൽ ഒന്നര ബില്യൺ ഡോളറാണ് ഫെഡറൽ ഗവണ്മെന്റ് ജോൺസൺ ആന്റ് ജോണ്സണ് നൽകിയത്. മോഡർന 94 ശതമാനവും ഫൈസർ 95 ശതമാനവും ഫലപ്രദമാണ്.
