ഭോപ്പാല്‍:വനിതാ ഓഫീസറെ ഭീഷണിപ്പെടുത്തി മധ്യപ്രദേശിലെ കോണ്‍ഗ്രസ് എംഎല്‍എ ഹര്‍ഷ് വിജയ് ഗെലോട്ട് കുടുങ്ങി. ഇതിന്റെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലാണ്.
സബ് ഡിവിഷണല്‍ മജിസ്‌ട്രേറ്റായ കാമിനി താക്കൂറിനെതിരെയാണ് എംഎല്‍എ ഹര്‍ഷ് വിജയ് ഗെലോട്ട് അസഭ്യം പറയുന്നത്. വീഡിയോയില്‍ ഇവര്‍ക്ക് നേരെ കൈചൂണ്ടി സംസാരിക്കുന്നതും കാണാം.
‘നിങ്ങള്‍ ഒരു സ്ത്രീയായിപ്പോയി. ഒരു പൊലീസുദ്യോഗസ്ഥനാണെങ്കില്‍ ഞാന്‍ നിങ്ങളെ കോളറില്‍ പിടിച്ച് മെമോ വാങ്ങിത്തന്നേനെ,’ വീഡിയോയില്‍ ഹര്‍ഷ് വിജയ് സംസാരിക്കുന്നത് വ്യക്തമായി കേള്‍ക്കാം. രത്‌ലം ജില്ലയിലെ സൈലാന ടൗണില്‍ ആണ് സംഭവം നടന്നത്. കര്‍ഷകസമരത്തിന്റെ ഭാഗമായി കോണ്‍ഗ്രസ് മാര്‍ച്ച് നടത്തിയിരുന്നു. സമരത്തിന്റെ ഭാഗമായി എംഎല്‍എ കുറച്ചുപ്രവര്‍ത്തകരുമൊത്ത് സബ് ഡിവിഷണല്‍ മജിസ്‌ട്രേറ്റായ കാമിനി താക്കൂറിനെ കാണാനെത്തി. താക്കൂര്‍ എംഎല്‍എ കാണാന്‍ വൈകി എന്നതായിരുന്നു എംഎല്‍എയുടെ പ്രകോപനത്തിന് കാരണം. എംഎല്‍എക്കെതിരെ നടപടിയെടുക്കണമെന്നാവശ്യപ്പെട്ട് ബിജെപി രംഗത്തെത്തിയിട്ടുണ്ട്.
പ്രതികരിക്കാൻ ഇവിടെ എഴുതുക: