നെയ്യാറ്റിന്കര: ജനറല് ആശുപത്രിയിലെ വനിതാ ജീവനക്കാരിയെ ക്രൂരമായി മര്ദ്ദിച്ച് കൈ ഒടിച്ചു. തിരുപുറം സ്വദേശിയായ വനിത സെക്യൂരിറ്റി ജീവനക്കാരി ബിന്ദുവിനാണ് മര്ദ്ദനമേറ്റ് ഇടതുകൈ ഒടിഞ്ഞത്. ഇന്നലെ രാവിലെ 11 മണിയോടെയാണ് സംഭവം.
ഭാര്യയുമായി എത്തിയ പൂവാര് സ്വദേശി ഇര്ഷാദാണ് ബിന്ദുവിനെ മര്ദ്ദിച്ചത്. ഭാര്യയുമായി എത്തിയ ഇയാള് വനിതകള്ക്കു മാത്രമുള്ള മുറിയിലേക്ക് കയറണമെന്ന് ആവശ്യപ്പെട്ടെങ്കിലും ബിന്ദു തടഞ്ഞു. ബലമായി അകത്തു കയറാന് ശ്രമിച്ച ഇര്ഷാദ് ബിന്ദുവിനെ മര്ദ്ദിക്കുകയായിരുന്നു. ചെറുക്കാന് ശ്രമിച്ചെങ്കിലും ബിന്ദുവിന്റെ ഇടതു കൈക്ക് പൊട്ടലുണ്ടായി.
ബിന്ദു ആറുവര്ഷമായി നെയ്യാറ്റിന്കര ജനറല് ആശുപത്രിയിലെ സെക്യൂരിറ്റി ജീവനക്കാരിയാണ്. കൈക്ക് പൊട്ടലുണ്ടായെന്ന് പരിശോധനയില് വ്യക്തമായതോടെ ബിന്ദുവിനെ നെയ്യാറ്റിന്കര ആശുപത്രിയില് തന്നെ പ്രവേശിപ്പിച്ചു. നെയ്യാറ്റിന്കര പോലീസില് പരാതി നല്കി.
