കട്ടപ്പന: രണ്ടര മാസം മുമ്പ് പ്ലസ്ടു വിദ്യാര്‍ത്ഥിനി ആത്മഹത്യ ചെയ്ത സംഭവത്തില്‍ ആത്മഹത്യാ പ്രേരണ കുറ്റത്തിന് രണ്ട് യുവാക്കളെ ഉപ്പുതറ പോലീസ് അറസ്റ്റ് ചെയ്തു. കാഞ്ചിയാര്‍ കിഴക്കേ മാട്ടുക്കട്ട പുളിമൂട്ടില്‍ ക്രിസ്റ്റി പി. ചാക്കോ, വെള്ളിലാംകണ്ടം പുത്തന്‍പുരക്കല്‍ ജിക്കുമോന്‍ എന്നിവരെയാണ് പോലീസ് അറസ്റ്റ് ചെയ്തത്.
കഴിഞ്ഞ ഒക്ടോബര്‍ 8നാണ് മേരികുളം ഇടപ്പൂക്കുളം സ്വദേശിനി ആത്മഹത്യ ചെയ്തത്. പ്രതികളില്‍ ഒരാള്‍ പെണ്‍കുട്ടിയുമായി അടുപത്തിലാകുകയും പിന്നീട് സ്വര്‍ണ്ണവും പണവും കടമായി വാങ്ങുകയും ചെയ്തിരുന്നു. സ്വര്‍ണ്ണം സ്വകാര്യപണമിടപാട് സ്ഥാപനത്തില്‍ പണയം വെച്ചു. പലതവണ സ്വര്‍ണ്ണവും പണവും തിരികെ ചോദിച്ചെങ്കിലും പ്രതികള്‍ പെണ്‍കുട്ടിയെ ഭീഷണിപ്പെടുത്തി.
ഇതില്‍ മനംനൊന്താണ് ആത്മഹത്യ ചെയ്തത്. പെണ്‍ക്കുട്ടി ഹയര്‍സെക്കന്‍ഡറിയില്‍ ഒന്നാം വര്‍ഷം പഠനത്തിനെത്തുമ്പോള്‍ പ്രതികളിവിടെ രണ്ടാം വര്‍ഷം വിദ്യാര്‍ത്ഥികളായിരുന്നു. പെണ്‍കുട്ടിയുമായി പ്രണയം നടിച്ച് സ്വര്‍ണ്ണവും പണവും കൈക്കലാക്കുകയായിരുന്നു. സ്വകാര്യ ധനകാര്യ സ്ഥാപനത്തില്‍ പണയം വെച്ച തൊണ്ടിമുതല്‍ പോലീസ് കണ്ടെടുത്തിട്ടുണ്ട്.
ഉപ്പുതറ പോലീസ് സര്‍ക്കിള്‍ ഇന്‍സ്പെക്ടര്‍ എസ്.എം. റിയാസിന്റെ നേത്യത്വത്തിലുള്ള പോലീസ് സംഘമാണ് അന്വേഷണം പൂര്‍ത്തിയാക്കി പ്രതികളെ അറസ്റ്റ് ചെയ്തത്.
പ്രതികരിക്കാൻ ഇവിടെ എഴുതുക: