തൊടുപുഴ: ഉടുമ്പന്നൂര്‍ പാറേക്കവലയിലും സമീപത്തെ ചാക്കപ്പന്‍ക്കവലയിലും എല്ഡിഎഫ് വിജയാഘോഷത്തില്‍ ഡിജെ പാര്‍ട്ടി. ഇന്നലെ വൈകിട്ട് ആറ് മണിക്ക് തുടങ്ങിയ ആഘോഷം രാത്രി വൈകിയും തുടരുകയാണ്. അടുത്ത രണ്ടാഴ്ച കൊറോണ വ്യാപനത്തില്‍ ഏറെ നിര്‍ണ്ണായകമെന്ന് ആരോഗ്യ മന്ത്രി പറയുമ്പോഴാണ് എല്ലാ മാനദണ്ഡങ്ങളും കാറ്റില്‍ പറത്തി ഡിവൈഎഫ്‌ഐയുടെ നേതൃത്വത്തില്‍ ആഘോഷം സംഘടിപ്പിച്ചത്.
കോതമംഗലത്ത് നിന്നാണ് ഡിജെ സംഘം എത്തിയത്. വലിയ തോതില്‍ യുവാക്കളും തടിച്ച് കൂടി ഡിജെയ്‌ക്കൊപ്പം നൃത്തം വെയ്‌ക്കുന്ന ദൃശ്യങ്ങളും സോഷ്യല്‍ മീഡിയയില്‍ വ്യാപകമാണ്. കരിമണ്ണൂര്‍ പോലീസിനെയും ആരോഗ്യ വകുപ്പിനേയും വിവരങ്ങള്‍ അറിയിച്ചെങ്കിലും നടപടി എടുക്കാന്‍ തയ്യാറായിട്ടില്ല.
ഉടുമ്പന്നൂര്‍ ടൗണില്‍ നടന്ന പരിപാടിയില്‍ പുറത്ത് നിന്നടക്കം 200ഓളം പേരാണ് എത്തിയത്. വലിയ തോതില്‍ പാട്ട് വെച്ചത് നാട്ടുകാര്‍ക്കും ബുദ്ധിമുട്ടായി. ഉടുമ്പന്നൂര്‍ പഞ്ചായത്ത് ഇടതുപക്ഷം പിടിച്ചതിന്റെ ഭാഗമായി സത്യപ്രതിജ്ഞാ ദിവസമായ ഇന്നലെ രാവിലെ മുതല്‍ വലിയ ആഘോഷങ്ങളാണ് പാര്‍ട്ടിയുടെ നേതൃത്വത്തില്‍ നടത്തിയത്. 300ഓളം പേര്‍ രാവിലെ നടന്ന പ്രകടനത്തില്‍ അണിനിരന്നിരുന്നു.
പ്രതികരിക്കാൻ ഇവിടെ എഴുതുക: