കുമളി: സംസ്ഥാനത്തേക്ക് കൊണ്ടുവരികയായിരുന്ന 50 ലക്ഷം രൂപയുടെ കുഴല്പണം കുമളി ചെക്ക് പോസ്റ്റില് എക്സൈസ് നടത്തിയ വാഹന പരിശോധനയ്ക്കിടെ പിടികൂടി.
രേഖകളില്ലാതെ പണം കടത്തിയ തമിഴ്നാട് സ്വദേശി ഡി. രാജീവിനെയും തമിഴ്നാട് രജിസ്സ്ട്രേഷന് കാറും കസ്റ്റഡിയിലെടുത്തു. 500ന്റെ നോട്ടുകള് അടങ്ങിയ 2.5 ലക്ഷത്തിന്റെ 20 കെട്ടുകളാണ് പിടിച്ചെടുത്തത്. കഴിഞ്ഞ ദിവസം രാത്രി 11.30നാണ് സംഭവം. പണം കൈവശം വച്ചിരുന്ന രാജിവിനെ ചോദ്യം ചെയ്തതിലൂടെയാണ് ഇത് കുഴല്പണമാണെന്ന് വ്യക്തമായത്. തുടര് നടപടികളുടെ ഭാഗമായി പണവും കാറും പ്രതിയേയും കുമളി പോലീസിന് കൈമാറിയതായി എക്സൈസ് ഉദ്യോഗസ്ഥര് അറിയിച്ചു.
പരിശോധനയില് എക്സൈസ് ഇന്സ്പെക്ടര് ഷൈബു പി.ഇ, ഓഫീസര്മാരായ യുനസ് ഇ.എച്ച്, വിനോദ് ടി.കെ, രഞ്ജിത് കവിദാസ് എന്നിവരും പങ്കെടുത്തു. ഇ ഡിയാണ് സംഭവം പരിശോധിച്ച് നടപടിയെടുക്കേണ്ടതെന്ന് കുമളി എസ്എച്ച്ഒ ജോബിന് ആന്റണി അറിയിച്ചു.
ജന്മഭൂമി ഓണ്ലൈന്