ന്യൂദല്‍ഹി : രാജ്യത്തെ കാര്‍ഷിക നിയമത്തില്‍ പുതിയ ഭേദഗതി വരുത്തിയത് കര്‍ഷകരുടെ ശാക്തീകരണത്തിനായാണ്. എല്ലാ കര്‍ഷകര്‍ക്കും ഗുണപ്രദമാകുന്ന വിധത്തിലാണ് പുതിയ കാര്‍ഷിക നിയമമെന്നും പ്രധാനമന്ത്രി നരേന്ദ്രമോദി അറിയിച്ചു. പ്രതിമാസ റേഡിയോ പരിപാടിയായ മന്‍ കി ബാത്തിന്റെ 71 -ാം പതിപ്പില്‍ രാജ്യത്തെ അഭിസംബോധന ചെയ്യുകയായിരുന്നു അദ്ദേഹം.
കര്‍ഷകരുടെ നന്മക്കായാണ് കര്‍ഷക നിയമഭേദഗതി. കര്‍ഷകരുമായി വിശദമായ ചര്‍ച്ച നടത്തിയ ശേഷമാണ് ഭേദഗതി വരുത്താന്‍ തയ്യാറായത്. ഇതിലുടെ കര്‍ഷകര്‍ ശാക്തീകരിക്കപ്പെടുകയാണ്. അവര്‍ക്കായി നിരവധി വാതിലുകള്‍ തുറക്കുന്നു. പുതിയ അവകാശങ്ങള്‍ അവര്‍ക്ക് ലഭിക്കുന്നു. അവര്‍ ആഗ്രഹിക്കുന്ന വിലക്ക് ഉത്പന്നങ്ങള്‍ വില്‍ക്കാനാകുമെന്നും പ്രധാനമന്ത്രി പറഞ്ഞു.
കര്‍ഷകരുടെ നന്മയാണ് കേന്ദ്ര സര്‍ക്കാരിന്റെ ലക്ഷ്യം. സത്വര നടപടികളിലൂടെ സര്‍ക്കാര്‍ കര്‍ഷകരെ ശാക്തീകരിച്ചു. കാര്‍ഷിക നിയമത്തിന്റെ ഗുണം നേരിട്ട് കര്‍ഷകര്‍ക്ക് ലഭിക്കും. ഉത്പന്നങ്ങള്‍ക്ക് ന്യായവില നിയമം മൂലം ഉറപ്പിക്കാനാണ് ഇതുകൊണ്ട് ഉദ്ദേശിക്കുന്നത്. കര്‍ഷകര്‍ക്ക് പരാതികള്‍ ഉണ്ടെങ്കില്‍ സബ്ഡിവിഷണല്‍ മജിസ്‌ട്രേട്ടിനെ നേരിട്ടുതന്നെ അറിയിക്കാനും സാധിക്കുന്നതാണ്. പുതിയ നിയമത്തെ കുറിച്ച് കര്‍ഷകരും മനസ്സിലാക്കണമെന്നും പ്രധാനമന്ത്രി അറിയിച്ചു.
സ്വദേശിവത്കരണം ആത്മനിര്‍ഭര്‍ ഭാരതിനെ ശക്തിപ്പെടുത്തുന്നുന്നതാണ്. സ്വദേശി ഉത്പന്നങ്ങളുടെ വിപണനം ഭാരതം ഏറ്റെടുത്തു. രാജ്യത്തെ ഉത്പ്പന്നങ്ങള്‍ക്ക് വിപണിയില്‍ നല്ല പ്രതികരണമാണ് ലഭിക്കുന്നത്. അതേസമയം കൊറോണ ഭീതി രാജ്യത്ത് ഇപ്പോഴും നിലനില്‍ക്കുന്നുണ്ട്. കോവിഡ് മാനദണ്ഡങ്ങളിലെ അയവ് ഗുരുതരമാണ്. രാജ്യത്തെ വിവിധ കമ്പനികള്‍ പ്രതിരോധ വാക്‌സിന്‍ ഉത്പ്പാദനം നടത്തി വരികയാണ്. കമ്പനികളുടെ പരീക്ഷണം അവസാനഘട്ടത്തിലാണെന്നും പ്രധാനമന്ത്രി കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: