ലേഡി സൂപ്പര് സ്റ്റാറിന്റെ ജന്മദിനത്തോടനുബന്ധിച്ച് വമ്പന് ഗിഫ്റ്റുമായി പുതിയ ചിത്രമായ നിഴലിന്റെ അണിയറ പ്രവര്ത്തകര്. പിറന്നാള് നിറവില് നിഴലിന്റെ സെക്കന്ഡ് ലുക്ക് പോസ്റ്റര് തന്നെ അണിയറ പ്രവര്ത്തകര് താരത്തിനായി പുറത്തുവിട്ടിരിക്കുകയാണ്. മോഹന്ലാല്, മമ്മൂട്ടി തുടങ്ങി മലയാളത്തിലെ പ്രശസ്തരായ നിരവധിപേര് ചേര്ന്നാണ് ചിത്രത്തിന്റെ സെക്കന്റ് ലുക്ക് പോസ്റ്റര് പുറത്ത് വിട്ടത്.
കുഞ്ചാക്കോ ബോബനും നയന്താരയും ആദ്യമായി ഒരുമിച്ച് അഭിനയിക്കുന്ന ചിത്രം കൂടിയാണ് നിഴല്. എറണാകുളത്തെ നിഴലിന്റെ ഷൂട്ടിങ് സെറ്റിലും ചെറിയ രീതിയില് താരത്തിന്റെ പിറന്നാള് ആഘോഷം സംഘടിപ്പിച്ചിരുന്നു. നടന് കുഞ്ചാക്കോ ബോബന്, സംവിധായകരായ അപ്പു എന് ഭട്ടതിരി, ഫെലിനി, നിര്മ്മാതാക്കളായ ജിനേഷ് ജോസ്, കുഞ്ഞുണ്ണി, ജിനു വി. നാഥ്, ഡിക്സണ് പെടുത്താസ് തുടങ്ങിയവര് പിറന്നാള് ആഘോഷത്തില് പങ്കെടുത്തു.
രാജ്യാന്തര പുരസ്കാരങ്ങളും സംസ്ഥാന സര്ക്കാറിന്റെ അംഗീകാരങ്ങളും നേടിയിട്ടുള്ള എഡിറ്റര് അപ്പു എന്. ഭട്ടതിരി ആദ്യമായി സംവിധാന കുപ്പായം അണിയുന്ന ചിത്രം കൂടിയാണ് നിഴല്. ചിത്രത്തിന്റെ തിരക്കഥ ഒരുക്കുന്നത് എസ്. സഞ്ജീവാണ്. ആന്റോ ജോസഫ് ഫിലിം കമ്പനിയാണ് നിര്മാണം. ദീപക് ഡി മേനോനാണ് ഛായാഗ്രാഹണം. സംഗീതം സൂരജ് എസ് കുറുപ്പ്.
