തിരുവനന്തപുരം: തൊളിക്കോട് പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസിലെ പ്രതിയായ മുന്‍ ഇമാം ഷഫീഖ് അല്‍ ഖാസിമിയെ വിദ്യാഭ്യാസ സ്ഥാപനത്തിന്റെ പ്രിന്‍സിപ്പലായി നിയമിച്ചു. മാത്രവുമല്ല, മതചടങ്ങുകളിലും പരിപാടികളിയും ഇയാള്‍ സജീവ സാന്നിധ്യവുമാണ്. ചൂനാട് മര്‍കസുല്‍ ഖാദരിയ്യയുടെ പ്രിന്‍സിപ്പലാണ് ഖാസിമി. ഇത്തരത്തില്‍ പീഡനക്കേസില്‍ പ്രതിയായ ഇയാളെ വീണ്ടും മതപരിപാടികളില്‍ പങ്കെടുപ്പിക്കുന്നതില്‍ ഒരു വിഭാഗം വിശ്വാസികള്‍ സോഷ്യല്‍മീഡിയയില്‍ പ്രതിഷേധം ശക്തമാക്കിയിട്ടുണ്ട്. ഖാസിമി നിലവില്‍ ജാമ്യത്തിലാണ്. കഴിഞ്ഞ ഫെബ്രുവരിയിലാണ് ഖാസിമി അറസ്റ്റിലായത്.
പ്രമുഖ മതപ്രഭാഷകനും തൊളിക്കോട് പള്ളിയിലെ ഇമാമുമായിരുന്നു ഷഫീഖ് അല്‍ ഖാസിമി. ഇമാംസ് കൗണ്‍സില്‍ സംസ്ഥാന സമിതി അംഗവുമായിരുന്നു. പീഡിപ്പിക്കാനാണ് കൂട്ടിക്കൊണ്ടുവന്നതെന്ന് ആരോപണം പള്ളി കമ്മിറ്റി നടത്തിയ അന്വേഷണത്തില്‍ ശരിവയ്‌ക്കുകയും ഇമാം സ്ഥാനത്ത് നിന്ന് മാറ്റുകയും ചെയ്തിരുന്നു.
പേപ്പാറ വനത്തോട് ചേര്‍ന്ന ആളൊഴിഞ്ഞ റബര്‍ തോട്ടത്തില്‍ ഇമാമിനെയും 14 വയസുള്ള പെണ്‍കുട്ടിയെയും ദുരൂഹസാഹചര്യത്തില്‍ തൊഴിലുറപ്പ് സ്ത്രീകള്‍ കണ്ടതാണ് കേസിനാസ്പദമായത്. തൊളിക്കോട് ജമാഅത്ത് പ്രസിഡന്റിന്റെ പരാതിയിലാണ് കേസെടുത്തത്. പെണ്‍കുട്ടിയോ ബന്ധുക്കളെ പരാതി നല്‍കാത്തതിനാല്‍ സംഭവം നടന്ന ദിവസങ്ങള്‍ കഴിഞ്ഞിട്ടും പൊലീസ് കേസെടുത്തിരുന്നില്ല. അഞ്ച് ദിവസത്തെ കൗണ്‍സലിങ്ങിനൊടുവിലാണു പീഡനവിവരം പെണ്‍കുട്ടി സമ്മതിച്ചത്.
തമിഴ്‌നാട്ടിലെ മധുരയിലുള്ള ലോഡ്ജില്‍ നിന്നാണ് ഇമാം പിടിയിലായത്. മൊബൈല്‍ നമ്പര്‍ കേന്ദ്രീകരിച്ചുള്ള അന്വേഷണത്തിനൊടുവിലാണ് മൂന്നാഴ്ചയ്‌ക്കു ശേഷം ഷഫീഖ് അല്‍ ഖാസിമിയെ പിടികൂടിയത്.
പ്രതികരിക്കാൻ ഇവിടെ എഴുതുക: