കണ്ണൂർ: തളിപ്പറമ്പിൽ പ്രായപൂർത്തിയാകാത്ത പെൺകുട്ടിയെ മാനഭംഗപ്പെടുത്താൻ ശ്രമിച്ച പ്രതിയെ പോലീസ് പിടികൂടി. കണ്ണൂര് സിറ്റി പോലീസ് സ്റ്റേഷന് പരിധിയിലെ ആനയിടുക്ക് സ്വദേശി പി.കെ.നസീര്(42) നെയാണ് പോക്സോ നിയമപ്രകാരം അറസ്റ്റ് ചെയ്തത്. തളിപ്പറമ്പ എസ്.ഐ പി.സി സഞ്ജയ് കുമാറിന്റെ നേതൃത്വത്തിലാണ് പ്രതിയെ പിടികൂടിയത്.
കഴിഞ്ഞ ചൊവ്വാഴ്ച വൈകുന്നേരമാണ് സംഭവം നടന്നത്. പെൺകുട്ടി കടയിൽ പോയി വീട്ടിലേക്ക് മടങ്ങുന്നതിനിടെ പിന്നാലെ സ്കൂട്ടറിൽ എത്തിയ പ്രതി കുട്ടിയെ കയറിപ്പിടിക്കാൻ ശ്രമിക്കുകയായിരുന്നു. കുതറി മാറിയ പെൺകുട്ടി ബഹളം വെക്കുകയും ചെയ്തു. ശബ്ദം കേട്ട് നാട്ടുകാർ ഓടിയെത്തുന്നതിനിടെ ഇയാൾ സ്കൂട്ടറുമായി രക്ഷപ്പെടുകയായിരുന്നു. തുടർന്ന് കുട്ടിയുടെ മാതാപിതാക്കൾ തളിപ്പറമ്പ പോലീസിൽ പരാതി നൽകി.
തുടർന്ന് സിസിടിവിയിൽ പതിഞ്ഞ പ്രതിയുടെ സ്കൂട്ടറിൽ സഞ്ചരിക്കുന്ന ദൃശ്യങ്ങൾ പോലീസ് പോലീസ് ശേഖരിക്കുകയും മാധ്യമങ്ങളിലും സോഷ്യൽ മീഡിയ വഴി പുറത്തുവിടുകയും ചെയ്തിരുന്നു. ഇയാള് ഓടിച്ചിരുന്ന ഹീറോ ഹോണ്ട ഫോര് ജി സ്കൂട്ടര് കേന്ദ്രീകരിച്ച് സൈബര് സെല്ലിന്റെ സഹായത്തോടെ നടത്തിയ അന്വേഷണത്തിലാണ് പ്രതി കുടുങ്ങിയത്. ക്യാമറയില് വ്യക്തമായി പതിഞ്ഞ വണ്ടി നമ്പറും സൈബര് സെല്ലില് നിന്ന് ലഭിച്ച വിവരങ്ങളുമാണ് പ്രതിയെ കണ്ടെത്താന് പോലീസിനെ സഹായിച്ചത്. പെൺകുട്ടി പ്രതിയെ തിരിച്ചറിഞ്ഞു. പ്രതിയെ കോടതിയിൽ ഹാജരാക്കി റിമാൻഡ് ചെയ്യും.
ജന്മഭൂമി ഓണ്ലൈന്