ഗസല്‍ പോലെ, മഴവില്ലു പോലെ മനസ്സില്‍ അനുരാഗം വിടര്‍ത്തുന്ന മധുര ഗാനങ്ങളുമായി പഞ്ചമം ക്രിയേഷന്‍സ്. മലയാള സംഗീത ലോകത്തെ മികച്ച കലാകാരന്മാര്‍ അണിനിരക്കുന്ന, പഞ്ചമം ക്രിയേഷന്‍സിന്റെ ‘പ്രണയസൗഗന്ധികങ്ങള്‍’ എന്ന ആല്‍ബത്തില്‍ ഗാനങ്ങള്‍ ആലപിക്കുന്നത് പ്രശസ്ത ചലച്ചിത്ര സംഗീത സംവിധായകനും ഗായകനുമായ ശരത്, പിന്നണി ഗായകരായ സുദീപ് കുമാര്‍, വിധു പ്രതാപ് എന്നിവരാണ്.
ഗായകനും സംഗീത സംവിധായകനുമായ ഡോക്ടര്‍ ജയേഷ് കുമാര്‍ സംഗീതം നല്‍കിയിരിക്കുന്ന ഈ ആല്‍ബത്തില്‍ അംബിക ആലപ്പി വിധുവും, യുകെയിലെ യുവ ഗായികയായ കുമാരി മേഘ്ന മനുവും ഓരോ ഗാനങ്ങള്‍ ആലപിച്ചിട്ടുണ്ട്. ആറു ഗാനങ്ങളുള്ള ഈ ആല്‍ബത്തില്‍ ഗാനരചന നിര്‍വഹിച്ചിരിക്കുന്നത് പ്രശസ്ത ഗാനരചയിതാവായ ഭരണിക്കാവ് പ്രേംകൃഷ്ണ, സുമേഷ് കുറ്റിപ്പുറം, ഡോക്ടര്‍ ആഷ സുധീര്‍, ജി.രാജേഷ് എന്നിവരാണ്.
പുല്ലാങ്കുഴല്‍കൊണ്ട് വിസ്മയം തീര്‍ക്കുന്ന രാജേഷ് ചേര്‍ത്തലയും ജോസി ആലപ്പുഴയും ഗാനങ്ങളുടെ പിന്നണിയില്‍ പ്രവര്‍ത്തിച്ചിരിക്കുന്നു. തബല പ്രണബ് ചേര്‍ത്തലയും വീണ ബിജു അന്നമനടയും. ഓര്‍ക്കസ്ട്രഷന്‍, പ്രോഗ്രാമിങ് ചെയ്തിരിക്കുന്നത് സി.എസ്സ് സനല്‍കുമാര്‍. മാസ്റ്ററിങ്, മിക്‌സിങ് അനൂപ് ആനന്ദ്.
ഗായികയായ അംബിക ആലപ്പി വിധു പ്രശസ്ത സംഗീതജ്ഞനായ ആലപ്പി വിധുവിന്റെ സഹധര്‍മ്മിണിയാണ്. അകാലത്തില്‍ പൊലിഞ്ഞ അവരുടെ ഓര്‍മകള്‍ക്കാണ് ഈ ഗാനസമാഹാരം സമര്‍പ്പിച്ചിരിക്കുന്നത്. ഒക്ടോബര്‍ അവസാനത്തോടെ പഞ്ചമം ക്രിയേഷന്‍സിന്റെ യൂട്യൂബ് ചാനലിലൂടെ ആല്‍ബം റിലീസ് ചെയ്യും.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: