അടല്‍ ബിഹാരിയുടെ ദീര്‍ഘവീക്ഷണം; ലോകത്തിലെ ഏറ്റവും നീളമുള്ള ഹൈവേ തുരങ്കം; അടല്‍ ടണല്‍ നരേന്ദ്രമോദി ശനിയാഴ്ച രാജ്യത്തിന് സമര്‍പ്പിക്കും

ന്യൂദല്‍ഹി: ലോകത്തെ ഏറ്റവും ദൈര്‍ഘ്യമേറിയ ഹൈവേ തുരങ്കം അടല്‍ ടണല്‍ ശനിയാഴ്ച പ്രധാന മന്ത്രി നരേന്ദ്രമോദി ഉദ്ഘാടനം ചെയ്യും. മണാലിയെയും ലഹൗല്‍ താഴ്‌വരയെയും ബന്ധിപ്പിക്കുന്ന ടണലിന്റെ നീളം 9.02 കിലോ മീറ്റര്‍ കിലോമീറ്ററാണ്. 2000 ല്‍ മുന്‍ പ്രധാനമന്ത്രി അടല്‍ ബിഹാരി വാജ്‌പേയ് ആണ് തന്ത്ര പ്രധാനമായ ഈ തുരങ്കം നിര്‍മ്മിക്കാന്‍ തീരുമാനം കൈക്കൊണ്ടത്. 2002 മെയ് 26ന് ദക്ഷിണ പോര്‍ട്ടലിലേക്കുള്ള അപ്രോച്ച് റോഡിന്റെ ശിലാസ്ഥാപനം നടത്തി അദേഹം പദ്ധതിക്ക് ആരംഭിക്കുകയും ചെയ്തു.  

അടല്‍ ടണല്‍ പ്രതിദിനം 3000 കാറുകള്‍ക്കും 1500 ട്രക്കുകള്‍ക്കും സഞ്ചരിക്കാവുന്ന രീതിയിലാണ് രൂപകല്‍പ്പന ചെയ്തിരിക്കുന്നത്.സമുദ്ര നിരപ്പില്‍ നിന്ന് 3000 മീറ്റര്‍ ഉയരത്തിലുള്ള (10,000 അടി) ഹിമാലയത്തിലെ പീര്‍ പഞ്ചാല്‍ റേഞ്ചില്‍ ഏറ്റവും നവീനമായ സാങ്കേതിക വിദ്യ ഉപയോഗിച്ചാണ് തുരങ്കം നിര്‍മിച്ചത്. തുരങ്കം യാഥാര്‍ത്ഥ്യമാകുന്നതോടെ മണാലി റോഡ് ദൂരം 46 കിലോമീറ്ററും യാത്രാ സമയം 45 മണിക്കൂറും കുറയും.

കനത്ത മഞ്ഞ് വീഴ്ച കാരണം വര്‍ഷത്തില്‍ ആറ് മാസം ഈ താഴ്വരയിലേക്കുള്ള യാത്ര റദ്ദാക്കിയിരുന്നു. തുരങ്കം വരുന്നതോടെ ഇതിന് ശാശ്വത പരിഹാരമാകും.

 അത്യാധുനിക സംവിധാനങ്ങളോടെ സജ്ജമാക്കിയിരിക്കുന്ന തുരങ്കത്തിനല്‍ അന്ുബന്ധ ഫയര്‍ പ്രൂഫ് സുരക്ഷാപാതയും തയ്യാറാക്കിയിട്ടുണ്ട്. 10.5 മീറ്റര്‍ വീതിയാണ് തുരങ്കത്തിനുള്ളത്.  

ബോര്‍ഡര്‍ റോഡ്സ് ഓര്‍ഗനൈസേഷന്‍ (ബി ആര്‍ ഒ) ഭൂമിശാസ്ത്രപരമായും പ്രകൃതിപരമായുമുള്ള പ്രതിസന്ധികളേയും കാലാവസ്ഥയേയുമടക്കം നേരിട്ടാണ് ഏറ്റവും കഠിനമായ 587 മീറ്റര്‍ ദൈര്‍ഘ്യമുള്ള സെരി നലാബ് ഫോള്‍ട്ട് സോണ്‍ അടക്കമുള്ള പ്രദേശങ്ങളില്‍ നിര്‍മാണം പൂര്‍ത്തിയാക്കിയത്.

സെമി ട്രാന്‍സ്‌വേഴ്‌സ് വെന്റിലേഷന്‍ സംവിധാനം, എസ്.സി.എ.ഡി.എ നിയന്ത്രിത അഗ്‌നിശമന സംവിധാനം, ഇലുമിനേഷന്‍ ആന്‍ഡ് മോണിറ്ററിംഗ് സംവിധാനം തുടങ്ങിയ ഏറ്റവും നവീനമായ ഇലക്ട്രോമെക്കാനിക്കല്‍ സംവിധാനം ഉപയോഗിച്ചാണ് തുരങ്ക നിര്‍മാണം നടത്തിയത്.

തുരങ്കത്തിലെ സുരക്ഷാ സംവിധാനങ്ങള്‍  

1) ഇരു കവാടങ്ങളിലും സുരക്ഷാ പരിശോധന സംവിധാനങ്ങള്‍

2) അടിയന്തര ആവശ്യങ്ങള്‍ക്കായി ബന്ധപ്പെടുന്നതിന് എല്ലാ 150 മീറ്ററിലും ടെലിഫോണ്‍ സംവിധാനം

3) എല്ലാ 60 മീറ്ററിലും ഫയര്‍ ഹൈഡ്രന്റുകള്‍ (അഗ്‌നിശമന ഉപകരണം)

4) എല്ലാ 250 മീറ്ററിലും സിസിടിവി ക്യാമറകള്‍ ഉള്‍പ്പെടെ ഓട്ടോ ഇന്‍സിഡന്റ് ഡിറ്റക്ഷന്‍ സംവിധാനം

5) ഓരോ കിലോമീറ്ററിലും വായു ഗുണനിലവാര പരിശോധന

6) ഓരോ 25 മീറ്ററിലും ഇവാകുവേഷന്‍ ലൈറ്റിംഗ്/എക്‌സിറ്റ് ചിഹ്നങ്ങള്‍

7) തുരങ്കത്തില്‍ എല്ലായിടത്തും ബ്രോഡ്കാസ്റ്റിംഗ് സംവിധാനം

8) എല്ലാ 50 മീറ്ററിലും അഗ്‌നിബാധയേല്‍ക്കാത്ത ഡാമ്പറുകള്‍

9) എല്ലാ 60 മീറ്ററിലും ക്യാമറകള്‍

2019 ഡിസംബര്‍ 24ന്  ചേര്‍ന്ന കേന്ദ്ര മന്ത്രിസഭായോഗമാണ്  അടല്‍ ബിഹാരി വാജ്പേയി നല്‍കിയ സംഭാവനകള്‍ പരിഗണച്ച് റോഹ്തങ്ങ് തുരങ്കത്തിന് അദ്ദേഹത്തിന്റെ പേര് നല്‍കാന്‍ തീരുമാനിച്ചത്.