ശാസ്താംകോട്ട: കരുനാഗപ്പള്ളി-ശാസ്താംകോട്ട റൂട്ടില്‍ മൂന്നുകിലോമീറ്ററിനിടെ രണ്ട് ലെവല്‍ ക്രോസുകള്‍ സ്ഥിതി ചെയ്യുന്നത് യാത്രക്കാരെ കടുത്ത ബുദ്ധിമുട്ടിലാക്കുകയാണ്. കുന്നത്തൂര്‍, കരുനാഗപ്പള്ളി താലൂക്കുകളെ ബന്ധിപ്പിക്കുന്ന ഈ പ്രധാന റോഡില്‍ 75 ഓളം ബസ് സര്‍വ്വീസുകള്‍ അടക്കം നൂറുകണക്കിന് വാഹനങ്ങളാണ് കടന്നുപോകുന്നത്.
മൈനാഗപ്പള്ളി ജംഗ്ഷന് പടിഞ്ഞാറാണ് ആദ്യത്തെക്രോസ്. തുടര്‍ന്ന് മൂന്നുകിലോമീറ്റര്‍ കഴിയുമ്പോള്‍ മാരാരിത്തോട്ടത്തെ രണ്ടാമത്തെ ലെവല്‍ ക്രോസായി.
ആദ്യത്തെ കടമ്പയില്‍ നിന്ന് രക്ഷപ്പെടുന്ന വാഹനങ്ങള്‍ ഉറപ്പായും രണ്ടാമത്തെ ലെവല്‍ ക്രോസില്‍ അകപ്പെടും. ലോക് ഡൗണ്‍ ആരംഭിച്ചശേഷം വാഹനങ്ങളുടെ തിരക്ക് കുറയുകയും ട്രെയിന്‍ സര്‍വീസ് നാമമാത്രമാകുകയും ചെയ്തതോടെ തിരക്കിന് കുറച്ച് അയവു വന്നിട്ടുണ്ട്. എന്നാല്‍ ഈ സാഹചര്യം മാറുമ്പോള്‍ സ്ഥിതി പഴയതുപോലാകുമെന്ന് യാത്രക്കാര്‍ പറയുന്നു.
മിനിറ്റുകളുടെ വ്യത്യാസത്തിലുള്ള പെര്‍മിറ്റുകളില്‍ പാഞ്ഞുവരുന്ന സ്വകാര്യബസുകള്‍ പലപ്പോഴും അടഞ്ഞ ലെവല്‍ ക്രോസിന് മുന്നില്‍ പരസ്പരം ഏറ്റുമുട്ടുന്നത് നിത്യസംഭവമായിരുന്നു. മാത്രമല്ല മുമ്പേ കടക്കാന്‍ ബസുകളും മറ്റ് വാഹനങ്ങളും നിരതെറ്റിച്ച് കടന്നുകയറി ഗതാഗത തടസ്സം സൃഷ്ടിക്കുകയും പതിവായിരുന്നു. തുടര്‍ന്ന് മണിക്കൂറുകളോളം കുരുക്കിലായി സംഘര്‍ഷാവസ്ഥ വ്യാപിക്കുന്നതും ഇവിടെ പതിവ് കാഴ്ചയാണ്.
ഇവിടെ ഓവര്‍ ബ്രിഡ്ജിന്റെ അനിവാര്യത ചൂണ്ടിക്കാട്ടി അധികൃതര്‍ക്ക് നിരവധി നിവേദനങ്ങള്‍ നല്‍കുകയും പ്രക്ഷോഭങ്ങള്‍ സംഘടിപ്പിക്കുകയും ചെയ്‌തെങ്കിലും യാതൊരു നടപടിയും ഉണ്ടായിട്ടില്ല. ഇതിനിടെ മൈനാഗപ്പള്ളി മേല്‍പ്പാലത്തിന് 30 കോടി രൂപ സംസ്ഥാന സര്‍ക്കാര്‍ അനുവദിച്ചതായി പ്രദേശത്തെ സിപിഎം നേതൃത്വം വ്യാപക പ്രചാരണം നടത്തിയിരുന്നു. എന്നാല്‍ ഈ പ്രചാരണം അടിസ്ഥാനരഹിതമാണെന്ന് മൈനാഗപ്പള്ളിയിലെ ജനപ്രതിനിധികള്‍ പറയുന്നു.
പ്രതികരിക്കാൻ ഇവിടെ എഴുതുക: